Русија отпиша 23 милијарди долари долг на африканските земји

Рускиот претседател Владимир Путин изјави дека Русија им отпишала долгови на африканските земји во износ од 23 милијарди долари. Говорејќи на вториот самит Русија-Африка во Санкт Петербург, Путин рече дека 90 отсто од долговите на африканските земји се подмирени, без повеќе „директни“ долгови, туку со одредени финансиски обврски.Путин истакна дека руското внимание кон Африка постојано расте, што, како што рече, е видливо во плановите за зголемување на дипломатското присуство на континентот.

„Ова е вистински практичен чекор за значително интензивирање на работата со африканските земји во политичката, деловната, хуманитарната, културната и туристичката сфера“, нагласи Путин.

Тој исто така рече дека Москва го поддржува и натамошното претставување на африканските земји во Советот за безбедност и другите структури на Обединетите нации.

„Политичката и економската улога на Африка расте експоненцијално, континентот станува нов центар на моќ, кој сите ќе мора да го земат предвид“, рече Путин.

Путин ја наведе африканската мировна иницијатива за Украина како пример за растечката политичка улога на овој континент.

„Ова само по себе кажува многу, бидејќи претходно сите посреднички мисии беа монополизирани исклучиво од земји со таканаречени развиени демократии“, рече Путин.

Рускиот претседател Путин исто така рече дека ситуацијата во многу региони на Африка останува нестабилна поради наследството од колонијалната ера и политиката на „раздели па владеј“ предводена од Западот.

„Сè уште не се отстранети низа манифестации на колонијализам, тие сè уште ги практикуваат поранешните метрополи. Монополот на некои земји во областа на финансиите, технологијата, дигиталниот развој и во областа на храната е неприфатлив, треба да се бори против него“, рече Путин.

Тој додаде дека развојот на Африка е попречен од тероризмот, ширењето на екстремистичката идеологија, транснационалниот криминал и пиратеријата.