(Видео) Апасиев: Ќе блокираме се’ што е поврзано со урбана мафија
Претседателот на Левица, Димитар Апасиев во гостувањето во Дневникот на Сител рече дека неговата партија во Собранието ќе ги блокира сите Закони кои се поврзани со, како што рече, урбана мафија, етнотрибализам и шовинизам и со феудализација, односно приватизација на земјиште.
-Секој Закон кој ќе дојде во Собрание ќе биде блокиран од наша страна бидејќи тоа е уништување на државноста, уништување на Републиката и тоа не смее да помине, барем додека има пратеник на Левица во Собрание. А, на следните избори ќе имаме многу повеќе пратеници и многу повеќе ресурси за блокада, вели Апасиев.
Сепак, тој рече дека блокадата не е начин на работа на Левица. Според него, тој и неговиот колега Борис Крмов досега го блокирале само донесувањето на Деловникот и Законот за лични карти.
-Ние таргетираме сензитивни теми, како што ви кажав, овие три во моментов и на нив ги ставаме нашите ресурси. Но, одиме до крај. Денеска го блокиравме Законот за урбанистичко планирање бидејќи е во корист на урбаната мафија. Тоа е сакање да се протне она што се гради кај Холидеј ин. Има и многу други дупки за побрза урбанизација, за пренамена на земјоделско во градежно земјиште, рече Апасиев.
Вели дека барањето на Левица е во процесот на донесување на ваквите закони да се вклучат експертите од фелата кои многу подобро ја разбираат тематиката отколку самите пратеници.
