Тони е на ваша совест! – Маричиќ без одговор дали ќе побара оставка од Бујар Дардишта

Од Министерот за правда Бојан Маричиќ вчера не добивме одговор дали ќе побара оставка од директорот на Управата за водење матични книги Бујар Дардишта и дали лично тој се чувствува одговорен што 19-годишното момче од скопска Шутка си почина без и да биде заведено дека некогаш било живо.

Сите надлежни државни органи кои имаа допир со барањето на Тони Сали, а беа против неговиот упис во Книгата на родени, отсега овој случај ќе го преземат на својата совест, изјави за САКАМДАКАЖАМ.МК заменичката-народен правобранител Сузана Салиу, која со години се бореше и наидуваше на затворени врати кај институциите обидувајќи се да му помогне.

Тони Сали почина во својот дом на улица Индира Ганди во скопската населба Шуто Оризари во средата навечер. Починал по прошетка. Полицијата соопшти дека на телото немало траги на насилство.

„Тони во матичната земја каде беше роден, бараше само извод на родени, само утврдување на еден матичен број. Не бараше два матични броја, не бараше фалсификуван пасош. Го бараше најосновното човеково право“, вели Салиу, алудирајќи на големиот скандал со креирани фалсификувани матични броеви во Управата за матични книги на родените и со бизнисот во МВР на стотици пасоши на меѓународни криминалци со крадење на туѓ идентитет.

Народниот првобранител со години водеше постапка за уписот на овој матурант во матичната книга на родени, но не успеа, бидејќи наиде на бирократско, непрофесионално и нехумано сфаќање и однесување на надлежните институции.

Извор: СДК