Интернационалниот филмски фестивал „Астерфест“ од 4 до 8 август во Струмица

Од 4 до 8 август во Амфитеатарот во Струмица, ќе се одржи 18-тото издание на Интернационалниот филмски фестивал „Астерфест“, во знакот на новите тенденции во кусометражниот, документарниот и авторскиот филм.

На фестивалот се доделуваат наградите: Златна, Сребрена и Бронзена потковица, Старозлатен проектор, Наградата за најдобар автор „Ацо Алексов“, Наградата за најдобро сценарио „Ѓорѓи Абаџиев“, како и други награди за најдобрите филмови. Во официјалната компетиција на фестивалот земаат учество професионални филмски автори и продукции од цел свет, а се прикажуваат кусометражни и долгометражни содржини

Главната програма е составена од: полскиот „3 генерации“ на Паулина Зиулковска, канадскиот „Гавранко“ на Шон Меккерон, британските филмови „Дебитантката“ на Елизабет Хобс и „Уште жив“ на Лијам Сент-Пјер, американските „Еж“ на Д. Митри, „За скептиците“ на Дон Вестлејк, бугарскиот „Задача“ на Дејан Ангелов, иранскиот „Помош“ на Мехди Хосеинзадех, црногорскиот „Проценти живот“ на Владимир Перовиќ, францускиот „Таткото, синот и рав Калменсон“ на Дајан Д. Валид, португалскиот „Трговци со мраз“ на Жоао Гонзалез, германските „Шекспир за сите“ на Ханес Рал и „Живот во меур“ на Натали Мекмахон и Никола Дрвошанов, како и словенечкиот „Легендата за Златорог“ на Леа Вучко.

Фестивалот за првпат ќе има три светски премиери. Првата е австралиската фикција „Штипење“ на Eми Патмор и Ана Дворжак, филм за ученичка во последна година од средното училиште која се бори со тивката болест што ја крие од мајка си, и понатаму несетено совладувана од притисокот на семејството, нејзините врсници и општеството.

Втората фестивалска премиера ќе биде македонскиот „Лука“, во режијa и монтажа на Ице Виранов, по сценарио на Џејд Бинева, краток документарец што го прикажува животот на група млади музичари од Струмица, кои во кризни времиња за опстојување на алтернативната културна сцена се борат да најдат начини за изразување на својата музичка креативност и иновативност. Кинематографер е Столе Ангелов, камерата е на Иво Јанков, музиката на Ставро Ангелаков и Љубен Маџиров, а продуценти се Никола Пијанманов и Васил Михаил.

Специјална премиера ќе има и „Сонцето не грее на сите страни“, по сценарио и во режија на на Глигор Кондовски, филм што ја следи приказната за македонскиот Елвис Присли-Ване Црнгаров, роден во струмичкото село Куклиш, кој заминува да живее во Австралија. Камерата и монтажата се на Слаѓан и Давид Милошевски, Беби Зекировски и Иван Костадиновски.

Од македонските филмови ќе бидат прикажани „Тале и Корона“ на Томислав Алексов, „Сценариото“ на Александра Кардалевска, „Звукот на тишината“ на Анастасија Лазарова Пилинг, како и дипломските филмови „Кажи ми дека сме за стварно“ на Максим Илковски и „Новиот почеток“ на Тања Симоновска.

Во програмата е и и краткиот британски филм што оваа година доби Оскар, „Ирско збогум“ на Том Беркли и Рос Вајт, како и данскиот номиниран за Оскар „Ивалу“ на Андерс Валтер.

На „Астерфест“ ќе има и проекција на реставрираната верзија на долгометражниот игран филм „Планината на гневот“, во знак на 5-годишнината од смртта на Љубиша Георгиевски и 55 години од продукцијата на филмот, со Ристо Шишков во главната улога.

Завршната вечер е предвидена за проекцијата на унгарскиот шеесетминутен „Звучен кафез“ на Корнел Силаги (Игор Бухаров), во чест на лауреатката Ладик, во повремена придружба на Георги Трајков со акустична гитара.

Официјалното стручно жири го сочинуваат: Гоце Ристовски, Дрита М. Фазлија и Мили Чумиќ.