Во Слупчане ништо ново – ЕВН не може да влезе без да исполни барања
И денеска беше тензично во кумановското село Слупчане. Жителите не им дозволија на екипите на ЕВН да работат на терен и покрај асистенција на полицијата. Како услов за да им дозволат на ЕВН да работат, мештаните доставија до компанијата барања во кои инсистираат:
- да им бидат простени досегашни долгови што изнесуваат по неколку илјади евра,
- да добијат бесплатни нови приклучоци,
- без разлика колку ќе потрошат во иднина да не им се фактурира повеќе од 3.000 денари.
- верските објекти во селото да не плаќаат струја.
- на секој крај од селото, таму каде што граѓанинот гради куќа, да му се обезбеди електрична мрежа од страна на ЕВН, а не граѓанинот да плаќа илјадници евра за бандери
- мерните уреди да не се поставуваат надвор од куќите.
Од ЕВН известуваат дека екипите на Електродистрибуција се соочуваат со вербални и физички напади од страна на жителите, како и целосни блокади за влез во селото и додека не се создадат нормални услови за работа, нема да работат на отстранување на дефекти или, пак, да реализираат редовни работни активности во тој регион.
