„Читај ја Македонија“ – Македонската книжевност за деца и млади претставена во Москва

Во срцето на руската престолнина, во Културниот центар „Фазил Искандер“ во Москва, од 23 до 30 април се одржуваат Деновите на македонската литература за деца и млади под наслов „Читај ја Македонија!“. Настанот, кој го организира Македонскиот културен центар во Москва, предводен од претседателката Олга Панкина, претставува прво вакво широко претставување на македонските автори за деца во Руската Федерација.

Целна публика се децата на возраст од 11 до 12 години, заедно со нивните наставници, кои преку книжевноста се запознаваат со културното и фолклорното наследство на Македонија. Панкина на отворањето накратко ја претстави историјата на словенското писмо, подвлекувајќи ја улогата на сесловенските просветители Кирил и Методиј, а потоа низ панорама ги претстави најзначајните македонски автори за деца – од класиците Ванчо Николески и Видое Подгорец, до современи имиња како Киро Донев, Биљана Станковска, Горјан Петрески, па сѐ до најмладите – Натали Спасова и Хана Корнети.

Особено внимание привлече романот „Другата мајка“ од Драгица Најческа, во превод на Олга Панкина и издание на московската издавачка куќа „У Никитских ворот“. Приказната за Кристина, десетгодишно девојче што ја загубило мајка си во скопскиот земјотрес од 1963 година, длабоко ги трогна присутните – и децата и возрасните.

Во рамки на програмата, беа читани и преведени песни и приказни од македонски автори како Бошко Смаќоски, Васил Пујовски, Волче Наумчески, Киро Донев, Панде Манојлов и други, а дел од нив се објавени и во јануарското издание на реномираното руско списание „Иностранаја литература“.

Актерите од Театарот „Город“ од градот Долгопрудни учествуваа во програмата со читање на преведените македонски приказни „Силјан Штркот“ и „Детето со ѕвезда на челото“, носејќи дел од македонското усно творештво пред руската публика.

Пред почетокот на Деновите, беше организиран и конкурс за деца и родители под наслов „Слушаме и цртаме македонски приказни“, на кој учествуваа деца од 3 до 14 години. Тие создадоа илустрации инспирирани од македонскиот фолклор, а најдобрите цртежи беа изложени во културниот центар, каде ќе останат отворени за посетители уште еден месец.

Проектот „Читај ја Македонија!“ е активен во Русија од 2014 година, а се одвива во текот на целата година со различни културни и книжевни активности. Главниот годишен настан традиционално се одржува напролет, во чест на Денот на словенската писменост, а годинава фокусот е поставен токму на книжевноста за најмладите читатели.

Со вакви настани, македонската култура добива свое видливо место на руската книжевна и културна мапа, а новите генерации се запознаваат со богатото наследство на еден мал, но значаен јазик и народ.