Разговорот со авторката на стихозбирката „Слобода А“  во Градска библиотека „Браќа Миладиновци“-Скопје

Во рамки на кампањата #ЧитамеСовремениМакедонскиАвтори на Градската библиотека „Браќа Миладиновци“-Скопје, на 4 декември (среда) во 19 часот ќе се одржи Разговорот со авторката на Стихозбирката „Слобода А“ од Ана Голејшка Џикова која е книга за месец декември во Градска библиотека „Браќа Миладиновци“-Скопје.

Кампањата #ЧитамеСовремениМакедонскиАвтори за 2024 година Градска библиотека „Браќа Миладиновци“-Скопје ја заокружува со поезија и со автентичните стихови на Ана од нејзината книга „Слобода А“, издание на ПНВ Публикации.

Како калеидоскопски слики пред нас минуваат песните во кои можеме да ја видиме Ана како бунтовничка, млада љубовничка, да посведочиме како љубовта создава живот, како тој живот расте, се раѓа и станува живот сам за себе, независен, а сепак, зависен и сврзан. Истовремено исполнета со љубов и страв од неизвесност, погодена од реални проблеми и притисоци под кои сите сме натиснати: живот во пандемија, под влијание на пропаганди и општа хистерија, притисоци што повторно ја будат бунтовничката во Ана, онаа што единствено може да живее од и за слободата“ пишува во поговорот Снежана Стојчевска

„Слобода А“ е книга на месецот и достапна е во сите библиотеки на Градска библиотека „Браќа Миладиновци“-Скопје .