Асанж: „Слободен сум затоа што се изјаснив за виновен за новинарство“

Основачот на Викиликс првпат се појави во јавноста откако излезе од затвор.

Основачот на Викиликс Џулијан Асанж ги повика европските пратеници да дејствуваат против зголемената „транснационална репресија“ на новинарството од страна на големите сили за време на обраќањето пред Парламентарното собрание на Советот на Европа (ПССЕ) во вторникот. Тоа беше негово прво појавување во јавноста откако беше пуштен од затвор кон крајот на јуни.

Асанж помина многу години затворен во затвор со висок степен на сигурност во Британија додека се бореше за екстрадиција во САД, кои го обвинија за незаконско добивање и откривање доверливи информации во врска со националната одбрана. Во јуни, тој склучи спогодба за признавање вина со американското Министерство за правда, формално признавајќи одредена вина и откажувајќи се од правото на правен регрес преку Европскиот суд за човекови права, во замена за слобода.

„Сакам да бидам целосно јасен. Денеска не сум слободен затоа што функционираше системот. Денес сум слободен, по години затвор, затоа што се изјаснив за виновен за новинарството“, им рече тој на членовите на Комитетот за правни прашања на ПССЕ во Стразбур.

Во своето сведочење, Асанж ја раскажа својата правна неволја и она што тој го нарече „кампања на одмазда“ од страна на ЦИА под директорот Мајк Помпео за време на претседателствувањето на Доналд Трамп. Според медиумските извештаи и други материјали, агенцијата спровела обемна кампања за надзор против издавачот, неговото семејство и соработниците. Таа, наводно, размислувала за киднапирање или убиство на Асанж додека бил заштитен со политички азил во Еквадорската амбасада во Лондон.

Асанж рече дека, иако неговата лична приказна била потресна, другите во истата ситуација не уживале исто ниво на публицитет и меѓународна поддршка. Во меѓувреме, светот драматично се промени на полошо откако тој го основа Викиликс, додаде тој.

„Гледам повеќе неказнивост, повеќе тајност, поголема одмазда за кажување на вистината и повеќе самоцензура“, рече тој. „Тешко е да не се повлече линија од гонењето на американската влада против мене – нејзиното преминување на сите граници со меѓународно криминализирање на новинарството – до заладената клима за слобода на изразување што постои сега“.

САД успешно ги злоупотребија европските правни постапки за да се одмаздат против издавачот и се охрабрени повторно да ја користат истата тактика, како и другите земји, тврди Асанж.

„Кога моќните нации чувствуваат право да таргетираат поединци надвор од нивните граници, тие поединци немаат шанса освен ако не постојат силни заштитни мерки и држава подготвена да ги спроведе. Без нив, ниту еден поединец нема надеж да се брани од огромните ресурси што може да ги распореди државниот агресор“, предупреди тој.