22-годишна девојка нападната од браќа во Драчево – уште еден аларм за насилството врз жените во Македонија
на 14 мај 2025 година, околу 21:25 часот, 22-годишната М.С. од Скопје пријавила во СВР Скопје дека била физички нападната од Ф.М. и неговите браќа во населбата Драчево. Според пријавата, напаѓачите употребиле и тврд предмет при нападот, а полицијата информира дека се преземаат мерки за расчистување на случајот, по што ќе следуваат соодветни пријави.
Иако околностите се сѐ уште под истрага, случајот повторно ја отвора болната тема за насилството врз жените во Македонија — појава што станува сѐ почеста, а институционалната заштита сѐ понеадекватна.
Според податоци од невладини организации и институции, само во последните години во Македонија се регистрираат илјадници случаи на семејно и родово базирано насилство, при што жртвите се најчесто жени. Истовремено, бројот на осудителни пресуди останува низок, а жртвите често се оставени сами, без психосоцијална поддршка, правна помош или безбедни услови за живот по пријавата.
Во држава каде што јавните политики се уште се водат со затворени очи кон родовата еднаквост и каде жените сѐ уште не се чувствуваат сигурни ниту на улица, ниту во сопствениот дом – секој ваков случај е потсетник дека системот мора итно да се промени.
Сè додека институциите не почнат да дејствуваат ефикасно, одговорно и навремено, прашањето не е дали ќе има нова жртва – туку која ќе биде следната?
