НР Кина подготвена да ѝ помогне на Палестина во мировните преговори со Израел

НР Кина е подготвена да им помогне на Палестинците да постигнат внатрешно помирување и да ги промовира мировните преговори со Израел, изјави кинескиот претседател Си Џинпинг по средбата со својот палестински колега Махмуд Абас во Пекинг.

„Фундаменталното решение за палестинското прашање лежи во формирањето на независна палестинска држава врз основа на границите од 1967 година со главен град источен Ерусалим“, рече Си, пренесуваат кинеските државни медиуми.

Палестинците бараат држава која ќе ги вклучи Западниот Брег, Газа и Источен Ерусалим, кој Израел го окупираше во војната во 1967 година.

Мировните преговори со посредство на САД пропаднаа во 2014 година, а нови вакви преговори, засега нема на повидок.

„Секогаш цврсто ја поддржувавме праведната кауза на палестинскиот народ да ги врати своите легитимни национални права“, му рекол Си на Абас, пренесува Хина, цитирана од Ројтерс.

НР Кина историски има добри односи со Палестинците, а од последната посета на Абас во 2017 година постојано ги промовираше своите вештини за посредување при спорови од вакво значење. Сепаk НР Кина се истакна во посредничката дипломатија со посредувањето идостугнувањето на изненадувачкиот договор меѓу Иран и Саудиска Арабија за обновување на дипломатските односи, што се случи во март годинава.

Со тридневната посета на Пекинг, Абас сака да ја демонстрира поддршката на НР Кина за палестинската државност, откако не успеа да договори средба со американски претставници минатата година во Њујорк, на седницата на Генералното собрание на Обединетите нации.

Си ја повтори поддршката на НР Кина за палестинската власт да стане полноправна членка на ОН, додавајќи дека Пекинг ќе продолжи да се залага за Палестина на мултилатералните форуми.

Вашингтон се противи на полноправно членство на Палестина во ОН без мировен договор со Израел. Зеленото светло на САД е неопходно бидејќи тие имаат право на вето како членка на Советот за безбедност на ОН.

Си рече дека меѓународната заедница треба да го зголеми развојот и хуманитарната помош за Палестинците.