Русија и НР Кина остануваат посветени на градењето на мултиполарен свет
Соработката меѓу Русија и НР Кина е главно за стабилизирање на меѓународната ситуација, изјави рускиот претседател Владимир Путин за време на средбата со кинескиот министер за надворешни работи Ванг Ји, кој вчера беше во официјална посета на Москва, пренесува РИА Новости.
„Соработката меѓу Народна Република Кина и Руската Федерација е многу важна за стабилизирање на меѓународната ситуација“, истакна рускиот претседател.
Според него, Русија активно соработува во меѓународни организации како Обединетите нации, Советот за безбедност, чиј постојан член е Русија, БРИКС и Шангајската организација за соработка.
Путин најави дека двете земји се стремат да ја остварат целта од 200 милијарди долари трговски промет порано од предвиденото.
„Ние си поставивме цел да достигнеме ниво од (трговија) 200 милијарди долари во 2024 година. Минатата година веќе беше 185 милијарди долари, постојат сите причини да веруваме дека ќе ги постигнеме нашите цели во однос на нивото на трговски промет , можеби и порано отколку што планиравме“, рече рускиот лидер.
Претседателот на Русија истакна дека растот на трговскиот промет на земјите е важен и за Москва и за Пекинг.
Владимир Путин, исто така, рече дека наскоро во Москва се очекува посета на кинескиот претседател Си Џинпинг и изрази надеж дека Руската Федерација и НР Кина ќе спроведат заеднички планови за лични средби, и покрај домашната агенда на Пекинг.
Москва и Пекинг се подготвени да ги бранат меѓусебните интереси на меѓународната сцена, изјави претходно рускиот Министер за надворешни работи Сергеј Лавров за време на разговорите со неговиот кинески колега Ванг Ји.
„Нашите односи се развиваат стабилно и динамично и покрај големите турбуленции на светската сцена. Демонстрираме солидарност и подготвеност да ги заштитиме меѓусебните интереси врз основа на почитување на меѓународното право и централната улога на ООН“, рече Лавров.
Ванг Ји, пак, истакна дека високата динамика на интеракција се одржува со напорите на претседателот Си Џинпинг и неговиот руски колега Владимир Путин.
„И покрај нестабилноста на меѓународната сцена, НР Кина и Руската Федерација секогаш ја задржуваат стратешката определба, цврсто и самоуверено се движат кон формирање на мултиполарен свет и остануваат посветени на мултиполарноста“, додаде кинескиот министер.
