Пендаровски: Целта на Софија не е Бугарите само да влезат во Преамбулата на Уставот, туку и во нормативниот дел
Шефот на државата Пендаровски во интервју за ТВ24 часа вели дека го советувал премиерот да не оди во Брисел и ја оценува одлуката на Бугарската црква за признавање на македонската како „безобразие“.
Претседателот Стево Пендаровски вели дека понудениот предлог од Франција може да биде добра основа за компромис со кој Репбулика Македонија ќе може да влезе во преговарачкиот процес со ЕУ, но смета дека на прашања како историските не им е местото во Преговарачката рамка.
Во интервју за ТВ24, Пендаровски откри дека Бугарија не бара Бугарите да бидат наведени само во Преамбулата на Уставот, туку и во неговиот нормативен дел. Пендаровски вели дека ниту една заедница во државата не е внесена во нормативниот дел на Уставот, па оттука не е можно да влезат ниту Бугарите. Во нормативниот дел на Уставот сега се споменуваат само македонскиот народ, Македонците кои живеат надвор од границите на државата, МПЦ и Исламската верска заедница.
Притоа, тој вели дека Софија не зборува за „Бугари“, туку за „македонски Бугари“, нешто што тој го толкува како враќање кон „срамната теза“ за дебугаризација на Македонија.
Нови бугарски барања
Тој оценува дека за Република Македонија не е лошо доколку во бугарскиот спор се вклучи и трета страна, алудирајќи на вметнувањето на некои прашања од билатералниот спор во преговарачката рамка, со што и ЕУ ќе биде контролор на нивното спроведување.
Пендаровски вели дека на вчерашниот состанок на министрите за надворешни работи на ЕУ, Бугарија излегла со пет нови барања за измени во францускиот предлог, а меѓу нив и едно во делот на јазикот со кое се барало „бугарското толкување за македонскиот јазик да добие еднаква правна сила во преговарачката рамка“. Меѓудругото и поради таквиот развој на настаните, Пендаровски рече дека го советувал премиерот Димитар Ковачевски да не оди на најавениот самит ЕУ-Западен Балкан во Брисел в четврток на 23 јуни.
„Самит Западен Балкан-ЕУ? За што да одиме кога ниту една земја не напредува“, вели Пендаровски.
Ковачевски, заедно со српскиот претседател Александар Вучиќ и албанскиот премиер Еди Рама, најавија дека размислуваат дали да одат на самитот во Брисел.
Пендаровски вели дека, сепак, не му се допаѓа што таква одлука се носи на ниво на Отворен Балкан- иницијатива која треба да има чисто економска поента- а не политичка.
