Реакциите не стивнуваат – мнозинството пратеници не го изгласаа предлогот на Левица за покачување на додатоците за лицата со попреченост

Коалицијата „Менуваме“ бара покачување на додатокот за попреченост за 20 проценти и тоа согласно растот на бруто платата. Ова како реакција доаѓа откако пратениците вчера го одбија предлогот на Левица со кој се предвидуваше сите додатоци што децата за попреченост ги добиваат, да се зголемат за сто проценти.

Суарет Алишан од коалицијата „Менуваме“ во изјава за „Слободен печат“ вели дека во 2021 година организацијата имала целосна програма на кој начин додатокот за попреченост линеарно да се покачува.

Но, родителите се поделија партиски и не ја искористија шансата тогаш, па сега во услови на енергетска криза, многу избрзаа. Ние како коалиција Менуваме децидни сме и бараме покачување на додатокот за попреченост за 20 проценти и тоа согласно растот на бруто платата. Ние ѝ велиме на државата да ни дава 20 проценти покачување со растот на бруто платата, а центрите за социјални работи да изготвуваат решенија за тоа. Тој модел ќе го истуркаме пред институциите на системот. Сметаме дека оваа мерка е многу подобра, бидејќи на ваков начин ќе го решиме проблемот и на идните генерации, да не излегуваат на улица, да плачат, да молат, туку како што ќе се качува платата, да се качува и додатокот, изјави Алишан.

Мнозинството пратеници во Собранието не го изгласаа предлогот на пратениците Димитар Апасиев и Борис Крмов од Левица, со кои се предвидуваше сите додатоци што децата за попреченост ги добиваат, да се зголемат за сто проценти. Според предлогот, посебниот додаток од 5.021 денар требаше да се зголеми на 10.042 денари, а додатокот за самохрани родители на деца со попреченост да се зголеми од 7.531 денар на 15.063 денари. За родителите кои се материјално необезбедени и корисници на гарантирана помош, предлогот беше износот од 6.276 денари да се зголеми на 12.552 денари.

Не сите барања на родителите се внесени во овој закон. Ќе пристапиме и кон промена на законот за социјална заштита и за пензиско и инвалидско осигурување, за да ги вметнеме понатаму сите барања на овие родители. Предлогот го предлагаме по скратена постапка, рече вчера пратеникот Крмов од собраниската говорница.

Според Крмов, власта го одбила предлогот само затоа што дошол од Левица.

За обичниот народ нема пари, а за владејачката класа и за политичарите има пари. Само Министерството за политички систем и односи меѓу заедниците има над илјада вработени, а 45 одат на работа. Тоа министерство ни влече 10 милиони евра годишно. Ние очигледно направивме голем притисок кој не е за занемарување и одбивањето на нашиот предлог ја крена на нозе целата јавност, што ми дава за право да сметам дека нешто системски ќе добијат лицата со попреченост, меѓутоа власта ќе си го припише на своето конто тој напредок, само да не биде дека Левица го предложила, како што беше и со минималната плата, и со недела неработен ден, вели за „Слободен печат“ пратеникот Крмов.

Лицата со попреченост и нивните семејства лани на протест побараа зголемување на додатокот за попреченост на 12 илјади денари, да се воведат асистенти, да им се дадат стаж и пензиско осигурување, како и соодветни центри за рехабилитација. Од тогашната средба во Министерството за труд и социјална политика, тие излегоа незадоволни зашто не им беа прецизирани рокови кога ќе ги добијат правата што ги бараат, туку само им било ветувано дека во иднина ќе се решат нивните проблеми. Тие сакаа да постават шатори пред Собранието, но Град Скопје не им издаде дозвола, па протестот се одвиваше вообичаено и еден ден.

Ребека Јанковска Ристески, родителка на лице со попреченост, тогаш побара да се направи и точна статистика односно Регистар за лицата со попреченост што досега се нема остварено. Родителите на децата со попреченост се жалат дека само за лекови месечно трошат и по 200 до 300 евра, а додатоците што ги земаат од државата не стигнуваат ни за тие лекови, а камоли за другите потреби.

Со своја реакција денеска се јави и Министерството за труд и социјална политика, според кое, предлог законот за изменување на Законот за детска заштита е неприфатлив и паушален. Според нив, се работи за закон фокусиран само на финансиска поддршка без да се земат предвид останатите потреби на децата и лицата со попреченост.

„Без анализи, законските решенија се само популизам и ништо повеќе. Министерството работи на пакет мерки кои ќе значат финансиска поддршка и трајно решение, кои ќе придонесат за вистинско унапредување на лицата со попреченост. Изминатиот период како министерство бевме во интензивна комуникација со здруженијата на родители на деца со попреченост и врз основа на нивните барања креираме пакет законски измени и мерки за унапредување на состојбата на децата и лицата со попреченост”, уверуваат оттаму.

Извор: Слободен печат