За геополитиката на вакцините

Статус на проф. Билјана Ванковска.

---

Геополитиката на вакцините е само еден аспект на геополитиката на пандемијата. Затоа, корените на сегашната ситуација на неправична распределба на вакцините на глобален план треба да ги бараме во основите на неолибералниот социо-економски поредок, а тој почива на нееднаквост, профит и непринципиелни коалиции.

Се сеќаваме како на почетокот предмет на побарувачка беше основната медицинска опрема, а речиси година дена подоцна битката е за вакцините. Тие се користат и како средства за казнување и дискриминација (на пример, кога во Израел не се планира вакцинирање на Палестинците или кога Иран е под санкции од Западот за увоз на медицинска опрема) или како парички за поткусурување. Пандемијата ја покажа важноста на државите, државниот апарат и неговата способност да ја гарантира безбедноста на граѓаните. Некои дури и зборуваат за класична биополитика, политика која се однесува на животот како таков (и смртта, се разбрира).

Во таквиот свет, кој ниту е нов ниту почна со пандемијата, Македонија била и останува вејка на ветерот. Како и на секој друг план, таа не покажува одлики на држава (без оглед што е мала), туку чека милостина и елитите уште и се фалат со тоа. Лојалноста кон НАТО (и Западот) е тоа што ја определува нивната политика, на буквално секој план: економија, инвестиции, инфраструктура, па сега и вакцини. Но, Западот си има свои приоритети, и ние остануваме на „опашката“. Ако од оваа лекција не научиме нешто како држава, наскоро нема ни да постоиме повеќе од нешто како управувана територија.

---