Лавров: ЕУ се обидува да го избрише сеќавањето на борбата против нацизмот – но архивите ја чуваат вистината

Рускиот министер за надворешни работи, Сергеј Лавров, денеска изјави дека Европската Унија се обидува да го избрише сеќавањето на борбата против нацизмот и резултатите од Втората светска војна, но архивските материјали остануваат доказ за историската вистина.

Говорејќи на отворањето на фотоархивската изложба на руската новинска агенција ТАСС, по повод 80-годишнината од победата над нацизмот, Лавров истакна дека руските архиви се силен одговор на обидите за фалсификување на историјата.

„Нивниот подвиг е бесмртен. Во овие услови, кога ЕУ се обидува да го избрише сеќавањето на војната против нацизмот, руските архиви остануваат сигурен чувар на историската вистина. Архивските материјали од воените години се ефективна алатка во борбата против фалсификувањето на историјата“, рече Лавров, пренесе ТАСС.

Како илустрација, тој го посочи писмото од шефот на привремената влада на Полска, Едвард Особка-Моравски, упатено до раководството на РСФСР на 16 февруари 1945 година. Во документот, изложен на настанот, полскиот премиер ја изразува својата верба во „вечното пријателство меѓу Полска, Русија и сите народи на Советскиот Сојуз“.

Изјавата на Лавров доаѓа во време на засилени тензии помеѓу Русија и западните земји, особено во контекст на различните историски интерпретации на настаните од Втората светска војна и нивното политичко значење денес.