Левица Радовиш: Политички поени за градоначалникот, а целосна негрижа за пожарникарите

Левица Радовиш јавно ја изнесе својата критика кон градоначалникот на општина Радовиш, Ацо Ристов од ДПМНЕ, по повод неговиот однос кон Територијалната противпожарна единица (ТППЕ) Радовиш. Во својата објава, која ја пренесуваме во целост, од Левица го оценуваат мандатот на Ристов како неоправдан маркетинг и тотална негрижа за потребите на пожарникарите.

„Во четиригодишниот мандат на градоначалникот Ацо Ристов – освен маркетинг на грб на донации за добивање политички поени, не видовме никакви конкретни мерки за подобрување на состојбата на ТППЕ Радовиш и нејзините пожарникари“, велат од Левица Радовиш.

Во објавата се потенцира дека помина речиси една година од големите пожари кои ја зафатија општина Радовиш и соседната општина Конче, но дека во изминатиот период локалната власт не презела никакви конкретни чекори за превенција. Не е набавена ниту потребна опрема, ниту механизација, а единственото што се случувало е „евтин маркетинг“ преку прикажување донации.

„Општините не преземаа мерки за справување со ризиците од пожарите, иако опасноста од повторни пожари оваа летна сезона е висока“, додаваат од Левица и апелираат за поголема грижа кон ТППЕ Радовиш, со создавање подобри услови за работа и набавка на неопходната опрема.

Во објавата, Левица ја честита „Денот на пожарникарите“ на сите пожарникари од Радовиш и пошироко, изразувајќи благодарност за нивните интервенции и за поддршката од донаторите.

„Ја повикуваме локалната власт да го зголеми вниманието и инвестициите во противпожарната служба, особено со оглед на искуствата од минатата година и зголемената опасност од пожари во летниот период“, стои во пораката на Левица Радовиш.

Оваа критика доаѓа во време кога јавноста сè повеќе ја следи работата на локалните власти и нивната одговорност кон безбедноста и заштитата на граѓаните од природни непогоди.