Топлина Подмолје лапна тендер од 1,7 милијарди денари за ископ на јаглен во РЕК Битола
Компанијата „Топлина Подмолје“ од село Подмолје, Охрид, ќе добие речиси 1,7 милијарди денари за ископ на јаглен и јаловина во Површинскиот коп Брод – Гнеотино, дел од РЕК Битола. Договорот беше објавен денеска на веб-страницата на Електронскиот систем за јавни набавки (ЕСЈН), а е склучен на 7 април 2025 година.
Во процесот на јавната набавка, државната компанија ЕСМ предвидела строги услови за учество, меѓу кои банкарска гаранција од 5% и минимален годишен приход на понудувачите од 350 милиони денари во последните три години. Дополнително, понудувачите морале да докажат техничка и професионална способност, вклучувајќи искуство со ископ на најмалку 600.000 кубни метри земјени маси, јаглен или руда во последните четири години.
На повикот се пријавиле само две компании – „Топлина“ и „МИС-КОМЕРЦ Митко“ од Скопје, а како победник била избрана „Топлина“.
Договорот е потпишан од управителот на компанијата, Ќирче Митрески, и директорот на РЕК Битола, Тони Петрушевски, заедно со неколку други службеници.
Во јавноста се појавуваат шпекулации за блиски релации меѓу управителот на „Топлина“ и актуелниот вицепремиер и министер за транспорт, Александар Николоски, но за сега тие информации не се официјално потврдени.
