Левица: Надлежните продолжуваат да си поигруваат со животите на пациентите со дијабетес и карцином

Во соопштението на партијата Левица, се истакнува дека поради недомаќинското и неодговорно функционирање на Министерството за здравство, повторно е доведено во прашање здравјето на пациенти кои се борат со дијабетес и карцином. Според Левица, во некои од инсулинските аптеки во државата нема инсулин, што сериозно ги загрозува пациентите со дијабетес, а Клиниката за радиотерапија и онкологија повторно потфрлува во грижата за онколошките пациенти. Овие пропусти, како што велат, директно доведуваат до загрозување на човечки животи.

Левица го критикува и неодговорното работење на Клиниката за онкологија во Скопје, која повторно не обезбедува соодветна терапија за пациентите со рак, што особено се однесува на лекот „Palbociclib“. Според нив, и по скандалот што изби пред две години, каде што беше откриено неспроведување на основни здравствени процедури, надлежните во клиниката продолжуваат со несовесно и опасно поигрување со животите на пациентите.

Партијата Левица ја осудува оваа ситуација и ги повикува министерот за здравство, Арбен Таравари, и директорот на Клиниката, Игор Стојковски, да покажат поголема одговорност и професионализам. Левица истакнува дека ова поигрување со човечките животи е недозволиво и бара веднаш да се преземат мерки за стабилизирање на здравствениот систем.

Во своето соопштение, Левица потсетува и на своето заложување за основање на државна веледрогерија, што би ставило крај на уцените и несигурноста од приватните снабдувачи на лекови. Претставниците на партијата потсетуваат дека во 2023 година поднесоа Предлог-закон за загарантирано право и целосно снабдување на пациентите со препарати за третман на дијабетес, но истиот не беше поддржан од тогашната влада.

„Министерството за здравство треба да се запраши за реалната состојба во здравствениот систем и да престане да се расфрла со празни зборови. Време е да се стави крај на нееднаквиот пристап до здравствените услуги и да се осигура дека секој граѓанин ќе има пристап до квалитетна здравствена грижа“, велат од Левица.