Француски вински скандал – Македонска смедеревка продавана како премиум вино од Бургундија
Француските власти, во соработка со Европол, открија голем вински скандал во кој винари од реномираните региони Шабли и Монтраше во Бургундија нелегално увезувале македонско вино, кое потоа го продавале како премиум француско вино. Според истрагата, мрежа од најмалку седум лица била вклучена во оваа измама.
Обвинителството наведува дека винариите купувале смедеревка од македонската винарска визба „Газда Ѓоко“ од Мрзенци. Виното било дополнително одлежувано во француски барик буриња за да добие специфичен вкус, по што било пласирано на пазарот како Шардоне под етикетите на познати бургундски винари.
Францускиот енолог Теле Репомаше, кој работи за една од винариите вмешани во скандалот, изјави дека биле импресионирани од квалитетот на македонската смедеревка.
- „Сфативме дека смедеревката од Македонија може да биде одлична алтернатива. Соленоста и минералноста се неверојатни. Како да одолееме, особено по таа цена?“ изјави Репомаше.
Сопственикот на македонската винарска визба, Ѓоко Трпески, изрази шокираност кога дознал за злоупотребата на неговото вино.
- „Бев шокиран кога дознав дека нашата смедеревка се продавала за 250 евра по шише. Ние ја продадовме за 50 евроценти!“ изјави Трпески.
Овој скандал предизвика бурни реакции во винскиот свет, ставајќи го под прашање интегритетот на некои од најпознатите француски винари. Истрагата продолжува со цел да се утврди целосниот обем на измамата и да се преземат соодветни правни мерки против одговорните.
