Актуелните функционери не се опфатени дури ни во првата фаза од истрагата што ја отвори Обвинителството

Актуелниот министер за економија Бесар Дурмиши, кадар на Вреди, актуелниот директор на Државниот пазарен инспекторат Влатко Стојкоски, кадар на ВМРО-ДПМНЕ, директорот на Дирекцијата за заштита и спасување (ДЗС) Џеват Селами, никој од актуелните директори на државните институции кои имале надлежност да ја контролираат и да знаат за дискотеката на смртта во Кочани, а кои ги водат кадри од ВМРО-ДПМНЕ и Коалицијата Вреди, не се појави во јавноста откако загинаа 59 млади луѓе, а речиси 200 се тешко повредени.

Овие актуелни функционери не се опфатени дури во првата фаза од истрагата што ја отвори Обвинителството, а во која се најдоа поранешните директори на овие институции, односно 34 лица и три фирми. Тие не се достапни ниту за медиумите. Единствено Стојкоски пред неколку денови во некаква изјава, кажа дека соработуваат со истражните органи. Толку.

Моментално во притвор и со лисици на рацете, пред камери заврши поранешниот министер за економија Крешник Бектеши, поранешниот директор на ДПИ Горан Трајковски и поранешниот директор на ДЗС, Беким Максути. Сите се осомничени дека како соизвршители сториле тешки дела против општата сигурност

Адвокатот на Бектеши, изјави дека не е логично тоа што во наредбата за истрага сите се осомничени за самиот пожар. Не се осомничени во однос на било каква злоупотреба, ниту за било што друго, туку за самиот пожар.

Од Министерството за внатрешни работи засега во притвор се седуммина полицајци и инспектори, но не и разрешените началници. Полициските началници и инспектори се сомничат дека без проверки и контрола на сопственикот на дискотеката им издале документи што во 2023 година биле употребени и претставени како точни процени за јавната безбедност и биле пратени во Министерството за економија.

Вечерта во дискотеката имало четворица полицајци, а едниот од нив загинал во несреќата. Засега се разрешени началникот на Секторот за внатрешни работи Штип, помошник началник на СВР Штип, началник на Одделението за полиција Штип, началник на Одделението за криминалистичка полиција Штип, началник на Одделение за внатрешни работи Кочани, Командир на полициска станица од општа надлежност Кочани и началник на надворешна канцеларија за криминалистички работи Кочани.

Никој од нив не е осомничен, иако министерот за внатрешни работи Панче Тошковски кажа дека полицајците таа вечер биле во дискотеката за да биде направена контрола на малолетници по претходно изготвен оперативен план, што значи дека за овој план требало да знаат челниците на кочанската и на штипската полиција, односно полицајците да дејствуваат по нивна наредба.

Според последната изјава на Тошковски, засега актуелните началници не се меѓу осомничените.

Дискотеката работела со години незаконски, не само што немала соодветна лиценца, туку функционирала во објект чија намена е лесна индустрија, а не угостителство. Прекршени се повеќе правила за противпожарна заштита. За целиот клуб имало само два ПП-апарати, немало излезни врати за евакуација, концертот на групата „ДНК“ бил одржан на диво, затоа нема писмен договор меѓу организаторот и изведувачите. Пиротехничките средства, кои беа причина за пожарот, според јавниот обвинител, ги донел бендот „ДНК“ и тие биле користени противзаконски.

Од почетокот на трагедијата се цитираат многубројни членови и закони, но факт е дека во малото гратче сите ја знаеле дискотеката и ја посетувале и никој од надлежните не реагирал.