Левица: Диверсификација на шумите за борба против пожарите

На Македонија и се потребни мешани шуми во борба против дивите пожари. Присуството на монокултури од борови дрвја поточно садење на големи површини од еден вид иглолисни дрва претставува ризик за создавање на шумските пожари. Овие униформни шуми создаваат континуиран, високо запалив извор на гориво и го олеснува брзото ширење на пожарите. Игличките и смолата од иглолисни дрва се особено запаливи и ги прави овие монокултури подложни на запалување и брзо ширење на пламенот.

Дополнително, насадите од иглолисни дрва често имаат густи, преклопени крошни коишто можат да ја заробат топлината и да промовираат интензивни, високи пожари кои се тешки за контрола при гасење.

Овие услови не само што го зголемуваат ризикот од катастрофални пожари, туку исто така го зголемуваат влијанието врз екосистемите и околните заедници. Ефикасните стратегии за управување, како што се воведување на различни видови дрвја, спроведување на контролирани пожари и создавање на пречки за пожари, се клучни за намалување на ризиците од шумските пожари поврзани со монокултурите на иглолисни дрвја.

Монокултурните шуми кои се наоѓаат близу до градовите, Штип, Виница, Кочани, Пехчево, Пробиштип но и други, претставуваат особена опасност за населението кое живее во близина. Подрачјето каде што се наоѓаат овие градови е таканаречено полупустинско подрачје кое е и така подложно на пожар.

Повикуваме на итно постапување за да се заштитат овие градови од опасноста што ja претставуваат монокултурите во нивна близина. Дополнително, повикуваме на ревидирање на процесот на пошумување во Македонија. Во идните проекти на пошумување мора да има садници кои се автохтони за нашите подрачја и поотпорни на пожари. Ги повикуваме институциите да ги спроведат најсовремените практики за пошумување и превенција на пожар во нашите шуми, стои во соопштението на партијата Левица.