(Видео) Левица: Пратеникот Јанчев ги поддржа протестите против „Бехтел и Енка“
Пратеникот од Левица Саше Јанчев за медиумите од протестот изјави:
Даваме поддршка, затоа што дејствувањето на конзорциумот „Бехтел и Енка“ ја девастира животната средина и директно го загрозува животот на луѓето во Прилеп!
Не нѝ е прв пат да ги поддржиме на блокадите, нашата пратеничка група и нашиот правен тим им е целосно на располагање на активистите.
Го побаравме Договорот, но не го добивме, и сега ќе бараме декласификација на истиот, затоа што има основано сомневање за сторено кривично дело „Злоупотреба на службена должност“ при негово потпишување, бидејќи прво беше потпишан договор, а потоа беа менувани закони за да одговараат на истиот.
Ако се утврди дека навистина има кривично дело, во правото постои правен принцип кој вели дека ‘од неправо не може да призлезе право’ и тоа е добар основ да се раскине договорот без да треба државата да плаќа штета“ – истакна пратеникот Јанчев од Левица на денешниот протест организиран од народната иницијатива „Спас за Прилеп“.
Пратеникот Саше Јанчев потоа додаде:
Со отворањето на рударскиот коп во близина на селото Ореовец, и оваа власт докажува дека за неа се важни исклучиво интересите на големите корпорации, дури и по цена на здравјето и благосостојбата на граѓаните.
Упатуваме остра критика кон владејачките гарнитури за неодговорното однесување и нивното одобрение за уништување на животната средина во Прилеп и околината од страна на конзорциумот „Бехтел и Енка“.
Отворањето на рударскиот коп од страна на „Бехтел и Енка“ претставува директна закана за животната средина и здравјето на жителите на селата Ореовец, Крстец, Плетвар и градот Прилеп, како и за ретките растенија и животни во оваа област.
Изворите на вода за пиење и наводнување коишто се од витално значење за Прилеп и околните села, се загрозени од минирањето и тешката технологија за ископ!
Ова ќе има катастрофални последици не само за околните села, туку и за целиот регион.
Левица како единствена политичка партија која недвосмислено стои на страна на народот и животната средина, како претходно – така и понатаму ќе продолжи со активна поддршка на сите заложби, протести и иницијативи за чиста и здрава околина!
Време е да се стави крај на капиталистичките интереси коишто се закана по нашите животи и иднина, заврши пратеникот од редовите на Левица Саше Јанчев.
