Димитријевиќ: Во XVI век било првото имплементирање на осум часовно работно време

Во интервју на порталот Работник координаторот на Трудовиот сектор на Левица, Александар Димитријевиќ, коментирајќи ги налудничавите феудалистички нагони на власта на СДСМ и ДУИ да го зголеми осум часовното работно време, сподели дека првото вакво ограничување датира уште од XVI век и констатираше дека предлог-законот ги уназадува правата на работниците за неколку векови.

„Не сакам ни да помислам дека воопшто може да се донесе ваков закон. Пред некое време истражував и дознав дека за првпат кралот Филип Втори во Шпанија, во 1594 година, со кралски едикт ја организирал работата на осум часовно работно време. Значи во XVI век е веќе имплементирано осумчасовното работно време како заштита на здравјето на работниците, а ние после пет века сакаме да донесеме закон кој ја зголемува прекувремената работа.“

Во продолжение Димитриевиќ додаде дека ако пројде овој предлог-закон, капиталистичкото лоби ќе побара целосна имплементација на овој закон во приватниот сектор.

„Секако дека ако пројде во јавен сектор, ќе пројде и пројде и во приватниот. Ние сме капиталистичко општество, а капиталот има силно лоби и исто како што се случи со Законот за недела неработен ден, ќе се случи и со овој Закон.“