Скопје култ – прв скопски електронски културен магазин

Културно информативниот центар – Скопје денес излезе со информација дека за прв пат од своето постоење, се основа електронски магазин. Првиот скопски електронски културен магазин ќе има за цел да ги запознае скопјани со сите случувања кои ќе се одвиваат на територија на Град Скопје.

Во прилог ја пренесуваме изјавата на КИЦ – Скопје.

Културно информативен центар – Скопје забрзано навлегува во сите пори на градското културно живеење. Културниот аспект веќе ги покажува своите резултати преку годишната програма која започна со својата реализација во Центарот. Она кое ќе биде новина во работата на Културно информативниот центар – Скопје е враќањето и на информативниот карактер на установата што ќе го воспоставиме преку издавање на првиот електронски градски културен магазин, насловен „Скопје култ“, вашиот водич за сите културните случувања во градските културни установи во Скопје!

Првиот број на „Скопје култ“ е издание за месеците април – мај 2022 година во формат на колор-издание, кое ќе излегува како двомесечник во електронска форма и ќе може да се преземе бесплатно на социјалните мрежи на КИЦ, а во моментов е достапен на следниов линк https://fliphtml5.com/ldesr/rzbn.

„Скопје култ“ ќе донесува преглед на културните настани во градот, како и авторски статии, за да се разбуди интересот за културата и уметноста, а културните вредности да се доближат до целата градска средина.

„Скопје култ“ настана како резултат на идејата дека Скопје заслужува магазин што ќе го издигне квалитетот на културниот живот и има намера да прерасне во задолжително четиво на урбаната пoпулација.
Во тековната 2022 година се предвидени пет броја, 4 двомесечни и еден декемвриски, како специјално ретроспективно издание.

Уживајте во содржините на СКОПЈЕ КУЛТ!

Антонио Димитров,
директор на Културно информативен центар – Скопје