Молкот на маршот во Кочани ја вреска вистината: Корумпираниот систем ги уби нашите деца – Време е да запре селективната правда

Кочани денес молчеше. Но тишината беше погласна од секој вресок. Низ улиците не се слушаше музика, не се извикуваа пароли, не се вееја знамиња. Само фотографии – на лицата на 60 млади животи, згаснати во огнената трагедија во дискотеката „Пулс“.

Нивните семејства, роднини и пријатели тргнаа во тажен марш, со слика во раце и болка во срце. Тргнаа од Паркот на Револуцијата – место што симболизира борба за правда и достоинство – и го преминаа градот во сенка на отворената рана. Од локација до локација: Општината, полицијата, судот, обвинителството. Институции кои молчат исто како тие што маршираат, но не од болка – туку од одговорността што одбиваат да ја понесат.

На транспарентите пишуваше она што никој од власта нема храброст да го признае: „Корумпираниот систем ги уби нашите деца“.

Во таа една реченица се собрани сите години на занемарени инспекции, купени дозволи, нефункционални институции и удобен политички клиентелизам.

Семејствата не бараат милост. Бараат правда. Но добиваат само селекција – селективна правда, селективна истрага, селективна одговорност. Осомничен е еден, виновни – сите, а казнети – никој.

Каде е државата кога најмногу боли?

Кога пожарот го голташе покривот на „Пулс“, го голташе и кредибилитетот на институциите. Зошто еден објект без основна безбедносна заштита работел со години? Кој му дозволил? Кој требал да го спречи? И зошто, повторно, како и во секоја македонска трагедија – вината се разлева, испарува и исчезнува?

Ова не беше марш – ова беше колективен лелек. Очај кој шета по улици, бидејќи правдата седи заклучена зад врати со политички печат. А додека институциите калкулираат кого смеат, а кого не смеат да обвинат – мртвите не се враќаат.

Во земја каде што правдата е партиска алатка, жртвите се статистика, а родителските солзи – дневна појава, граѓаните се оставени сами да се борат за она што требаше да биде основно право: Да не изгори нивното дете во дискотеки без дозволи. Да не умира во систем без совест.

Срамот не е нивен. Срамот е на власта!