Промоција на „Метафора – жито, какол и парчиња стакло“ од Марко Трпески
Во галеријата „Метаноја“ во Скопје вечерва со почеток од 19 часот ќе се одржи промоција на збирката илустрации и текстуални минијатури „Метафора – жито, какол и парчиња стакло“ од Марко Трпески. На промоцијата ќе говорат академик Влада Урошевиќ и Оливера Ќорвезироска, а промоцијата на книгата ќе биде збогатена со изложба на дигитални графики од циклусот „Метафора“.
Станува збор за спој меѓу визуелната и книжевната уметност. Книгата е своевидно продолжение на неговото дебитантско дело „Метафора – поглед зад огледалата“ и нуди нови психолошки длабочини и надреалистички израз.
Збирката од илустрации и поетски минијатури формираат деликатна, симбиотска врска. Во светот на Трпески, пишаниот збор и визуелната слика се впуштаат во тивок дијалог – секој надополнувајќи го другиот без отворено објаснување. Интеракцијата ги предизвикува читателите да се движат низ слоеви од значење, вовлекувајќи ги во простор каде што свесната мисла се среќава со потсвеста и пошироко.
Марко Трпески (1990, Скопје) е визуелен уметник и графички дизајнер со посебен фокус на книжевната илустрација. Добитник е на неколку награди за најдобар дизајн на корица на книга. Предавач е во областа на дигиталната илустрација, основач на креативното студио „Метафора“ и еден од основачите на неформалниот колектив за колаж „Скопје колаж колектив“. За себе вели дека е хобистички трагач и несертифициран, но страстен собирач на метафори.
