Левица ги спасува карпошани од бетонизацијата

Советникот од Левица во Општина Карпош, Мартин Димоски, преку социјалните мрежи во четвртокот информираше дека е прекината Втората седница на Советот, откако четирите предлог одлуки за укинување на Деталните урбанистички планови „сѐ уште ‘патуваат’ до претседателот на Советот (веќе 13 денови)“.

Димоски притоа посочува дека на предлог на неговата партија биле усвоени четири точки за ревизија на два ДУП-а и забрана за издавање градежни дозволи за градби во рамките на тие детални урбанистички планови.

Преходно во понеделникот советникот, исто така, преку социјалните мрежи информираше за јавната презентација на 39 Детални урбанистички планови кои се изработени и отпочнати во мандатот на претходниот градоначалник Стефан Богоев.

Тогаш Димоски оцени дека ови ДУП-ови „го отвораат патот кон узурпација и дехуманизација на просторот наместо обезбедување на зелени површини кои се повеќе од потребни за граѓаните, кои пак се сѐ погласни во спречување на една нова бетонизација на овој дел од градот“.

„Од презентираните 39 детални урбанистички планови за Општина Карпош, она што може да се заклучи (меѓудругото) е следно:
1. На местото на фабриката Алумина , Пуцко Петрол може да гради висококатница од 105 метри
2. Ќе се уништат фудбалските игралишта на Алумина и Локомотива, а на нивно место ќе никне станбен објект и улица со што Општина Карпош ќе има само еден терен за голем фудбал (во Бардовци)
3. Од Зоолошка па се до Карпош 4, покрај бул. Илинденска ќе има станбено-деловни објекти
4. На повеќе локации е планирано станбени згради со приземје и 12 спрата
5. Ќе имаме неколку нови станбени комплекси од типот на Настел
6. Нови згради се планирани и на Букурешка, Прашка и Варшавска
7. Нови станбени згради ќе има и во Влае, Козле, Карпош 4
8. Планирани се над 40-тина згради, а согласно предвидената изградена површина се очекува во нив да живеат над 15.000 жители што е четвртина од сегашната бројка на жители. Тука не се вклучени претходно планираните згради во ДУП-овите усвоени изминатите четири години. Со нив, бројката на нови жители ќе се зголеми за околу 30.000 жители
9. Се предвидуваат изградба на повеќе верски објекти од училишта, градинки и игралишта
10. Парковите спроти студентскиот дом „Гоце Делчев“ и Алумина ќе бидат претопени во сообраќајници

11. Единствените големи површини со зеленило ќе останат во дел од Градски Парк и над Горно Нерези.

Речиси сите овие урбанистички планови се отпочнати во мандатот на Стефан Богоев, а најголем дел од истите се нарачани од градежни компании кои со години го силуваат Скопје“, објави Димоски.