Мерц: Германија го укинува ограничувањето за воена помош на Украина – дозволувајќи напади врз руска територија

Германскиот канцелар Фридрих Мерц изјави дека Германија, како и Велика Британија, Франција и САД, ги укинале ограничувањата за дометот на оружјето што се испорачува на Украина. Ова му овозможува на Киев да користи вооружување со долг дострел за напади на воени позиции на територијата на Русија.

„Веќе нема никакви ограничувања за дометот на оружјето што се испорачува во Украина – ниту од Британците, ниту од Французите, ниту од нас, ниту од Американците“, изјави Мерц во интервју за германската телевизија WDR. Тој додаде дека сега Украина има можност да се брани и да извршува напади дури и на руска територија, што претходно не било дозволено.

Кон средината на април, Мерц призна дека Германија може да испорача крстосувачки ракети „Таурус“ на Украина, доколку тој чекор биде координиран со европските партнери. Сепак, министерот за одбрана Борис Писториус посочи дека постојат „многу аргументи“ против таква одлука.

Од руска страна, портпаролката на Министерството за надворешни работи, Марија Захарова, предупреди дека Москва ќе го смета секој напад со германски ракети „Таурус“ врз руски објекти како директно учество на Германија во борбените операции на страната на Украина.