Левица Велес бара итен крај на хаосот на улицата Белградска – 9 месеци кал и изговори

Жителите на Белградска не можат да си стигнат до дома без да газат кал, вирови и ровови. Секојдневно се движат по дворовите на своите соседи, како илегалци, само за да избегнат општинската голгота. Постарите лица, децата, па и возачите се оставени на милост и немилост. А градоначалникот и општинските служби? Молчаливи, неспособни или едноставно рамнодушни.

Левица Велес остро реагира: ова е недозволива негрижа и институционален срам. Девет месеци улица во градска зона да биде во хаос, а единствен одговор да биде „времето не беше добро“, е чиста демонстрација на некомпетентност. Каде се дневните извештаи, каде е одговорниот проект-менаџмент, каде е надзорот?

Бараме веднаш: итно завршување на реконструкцијата, јавно извинување до жителите на Белградска, преземање одговорност од лица кои го водат овој проект, истражување дали се прикриваат финансиски злоупотреби и ненаменско трошење средства.

Девет месеци поминаа, а улицата „Белградска“ во Велес сè уште личи на ров од воена зона. Девет месеци – за една улица! Толку време не им требаше ни на римјаните да изградат пат низ Алпите. Но, на општинските власти очигледно им треба речиси цела година да сменат една водоводна цевка и да фрлат малку асфалт.

Од Општина Велес, веќе познато, пристигнуваат истите флоскули и изговори: „стара азбестна цевка“, „непредвидени работи“, „времето не беше погодно“. Дали навистина веруваат дека народот ќе им поверува оти девет месеци улица не може да се среди заради временски услови? Па тоа е навреда за здравиот разум на граѓаните.