(Видео) Еди Рама клекна на колена пред Џорџа Мелони и ѝ подари шал за роденден

На Светскиот самит за иднината на енергијата во Абу Даби, албанскиот премиер Еди Рама приреди изненадување за италијанската премиерка Џорџа Мелони по повод нејзиниот 48-ми роденден. Рама клекна пред Мелони, ѝ подари шал дизајниран од италијански уметник кој се преселил во Албанија, и ја поздрави со песната „Tanti auguri“ (Среќен роденден).

Во шеговит момент, Рама се обиде да го постави шалом преку главата на Мелони, што предизвика насмевки и пријателска атмосфера меѓу двајцата лидери . Мелони, изненадена, му се заблагодари и го прегрна Рама, кој често ја нарекува „сестра“.

И покрај нивните различни политички ставови — Мелони е лидер на десничарската партија „Браќа на Италија“, а Рама на албанската Социјалистичка партија — двајцата имаат блиска соработка. Минатата година потпишаа договор за пренасочување на дел од мигрантите од Италија во центри во Албанија, иако имплементацијата на овој план се соочува со правни предизвици.

На самитот, Италија, Албанија и Обединетите Арапски Емирати потпишаа договор вреден најмалку 1 милијарда евра за изградба на подморски енергетски кабел низ Јадранското Море, со цел зајакнување на обновливите извори на енергија во регионот.

Гестот на Рама беше поздравен како симбол на пријателство и културна поврзаност меѓу двете земји, потврдувајќи дека дипломатијата понекогаш може да биде и лична и емотивна.