Втора едиција на Деновите на поезијата – Почит на македонската азбука и поезија
Втората едиција на Деновите на поезијата, која ќе се одржи од 19 до 21 мај 2025 година, ќе го обедини македонското поетско наследство со современите културни текови, во организација на Фондацијата „Ацо Шопов – Поезија“ и Скопје Сити Мол. Манифестацијата ќе биде специјално посветена на важни личности од македонската поезија и литература, а ќе се обележи и јубилејот од 80 години од македонската азбука.
Со свечено отворање на 19 мај, ќе бидат нагласени значајни имена како Браќата Миладиновци, Григор Прличев, Славко Јаневски, Лилјана Чаловска, Гого Ивановски, како и многу други современи автори. Во рамки на програмата, поезијата ќе има посебна почит, а особено ќе се оддаде омаж на поетите Линдита Ахмети и Михаил Ренџов, кои нè напуштија меѓу двете едиции на манифестацијата.
Од универзитетската фела ќе учествуваат познати имиња како Наташа Аврамовска, Владимир Мартиновски и Весна Мојсова-Чепишевска, а од уметничката сфера ќе се придружат Сашо Гигов-Гиш, Петар Ренџов, и Никола Ристановски. Поетските изведби ќе вклучат настапи на современи македонски поети како Павлина Атанасова, Гордана Михаилова-Бошнакоска, Раде Силјан, и многу други, кои ќе ја делат својата поезија со публиката во Скопје Сити Мол.
Генерации нови поети ќе се претстават за прв пат пред публиката благодарение на поддршката на ПНВ Публикации и Култура бета. Меѓу дебитантите ќе се најдат Јована Алексовска, Селин Есад, Христијан Илиевски, и Максим Костадинов. Специјална програма ќе биде посветена и на македонската азбука, која ќе ја оживее Скопје Сити Мол со уникатни настани, како што е „Бушавата азбука“ каде деца ќе имаат можност да цртаат и пеат македонски букви.
Паралелно со поетските настапи, на посетителите ќе им бидат достапни и различни интерактивни активности. Ученици од основно и средно образование ќе се натпреваруваат во рецитирање на поезија, а Факултетот за драмски уметности и Факултетот за музичка уметност ќе ја збогатат програмата со музички и драмски настапи.
Посетителите ќе имаат можност да учествуваат и на „Поетското тркало на среќата“, каде ќе може да читаат свои стихови и да се натпреваруваат за награди. Во чест на Ацо Шопов, духовниот татко на оваа манифестација, ќе се создаде единствена атмосфера помеѓу стварноста и фантазијата, како што тој самиот напиша: „Поезијата е и стварност и фантазија, мит на јавето за блиското и далечно минато, за блиската или уште подалечна иднина“.
Деновите на поезијата се одлична можност да се заокружат важни културни моменти, да се оддаде почит на македонската литература и да се создаде простор за нови поетски изрази во срцето на Скопје.
