Кина ја лансира првата 10G широкопојасна мрежа во светот – најбрз интернет на планетата во „паметниот град“ Сионѓан

Кина официјално ја пушти во употреба првата 10G широкопојасна интернет мрежа во светот, сместена во Сионѓан – нов град изграден од темел како футуристички центар за напредни технологии. Градот сега е дом на најбрзиот интернет на планетата, со брзини што достигнуваат до 10 гигабајти во секунда.

Мрежата е развиена во соработка со технолошкиот гигант „Huawei“ и телекомуникацискиот оператор „China Unicom“, и користи „50G-PON“ технологија, која овозможува екстремно брзо симнување на податоци. Со овие капацитети, корисниците во Сионѓан ќе можат да стримуваат 8K видеа без прекин, да играат „cloud“ видео игри со речиси нула латентност и да користат напредни апликации во области како што се вештачка интелигенција, проширена реалност (AR/VR) и инфраструктура за паметни градови.

Сионѓан, лоциран на околу 110 километри од Пекинг, е дизајниран како модел за „паметен град“ што ги вклучува принципите на одржливост и ефикасност, со т.н. концепт на „15-минутен животен круг“ – каде што сите секојдневни потреби се достапни на само неколку минути пешачење.

И покрај инвестиции што надминуваат 100 милијарди долари, Сионѓан честопати е нарекуван „град на духови“ поради слабиот интерес од приватниот сектор и недоволен број жители.

Со оваа револуционерна мрежа, Кина покажува сериозни амбиции во дигиталната инфраструктура, оставајќи го остатокот од светот – кој сè уште активно работи на 5G мрежи – чекор зад себе во однос на брзината. Но, предизвикот сега е дали ваквата технолошка надмоќ ќе биде поддржана и со реална примена и живот во ваквите „градови на иднината“.