(Видео)Колку вреди еден живот? – Срамна пресуда од две години затвор за смртта на Теодора Ристовска

• „Колку вреди животот на сестра ми? Дали нејзината младост може некој да ја врати? Мојата душа дали може некој да ми ја врати?“ – со солзи и гнев зборува Ева Ристовска, сестрата на трагично загинатата Теодора, по шокантната пресуда што денес ја потресе јавноста.

Денес, македонското судство уште еднаш ги покажа своите темни длабочини. Судот донесе срамна и понижувачка одлука: само две години затвор за човекот кој ѝ го одзеде животот на 22-годишната Теодора, прегазена на пешачки премин во Тетово. Не пијан, не надвор од контрола – туку едноставно без одговорност, без свест за животот пред себе. А сега и без соодветна казна.

Теодора не е број. Таа беше млада, полна со планови, амбиции, со живот кој само што започнуваше. Девојка која чекореше преку пешачки, таму каде што треба да си најбезбеден. Наместо да стигне дома, нејзиниот живот згасна на асфалтот – тивко, неправедно, и денес – речиси и понижувачки.

Наместо правда, нејзиното семејство доби само уште една шлаканица. Две години затвор. Колку вреди еден човечки живот? Очигледно – многу помалку отколку што вреди врската што ја имаш во судството. И повторно – неказнивост за оние што газат по законите, по човечноста, по туѓата судбина.

Ова не е само лична трагедија. Ова е дијагноза на правниот систем во Македонија – заразена, изгниена и корумпирана институција што одамна заборавила да штити жртви. Да суди според морал и правда. Да биде инструмент на вистината.

И додека Теодора веќе втора година не е меѓу нас, човекот кој ја лиши од живот, веројатно ќе излезе од затвор пред нејзиното семејство да се опорави од шокот. Ќе продолжи со животот, додека за Ристовски – времето застана.

Судството, денес, уби уште еднаш.

А прашањето останува да виси:
Колку вреди животот на Теодора?
Во оваа држава, очигледно – дваесет и четири месеци.

И не ден повеќе.