Игнорантскиот однос на оние кои одлучуваат во Македонија директно овозможува трагедии!

• Пишува Круме Богевски – Советник од Левица во Општина Кавадарци

Сигурен сум дека многумина реагираат, многумина се борат, но зошто тогаш улиците ни стануваат тесни гробници? Сигурен сум дека има многумина како мене кои гледаат што се прави со урбанистичкото (не)планирање и не можат да го издржат тоа! Вистинските професионалци во општините се замолчувани!

Зошто, и покрај сета алармантна реалност, сѐ уште е дозволено урбанистичко (не)планирање кое ги потценува и човекот и неговата безбедност?

Можеби кога власта би се запрашала: „Зошто бре овој Круме (или некој како мене) скока толку? Дали можеби навистина има нешто опасно во овој план?“ – ќе бидат отстранети доста неправилности! Но не, тука огромна улога игра и неприкосновеноста на власта. „Видејте ме“, „јас сум бог и батина“, „небањати сте вие, немате искуство со власт, појма немате – ние знаеме!“ – оваа реторика е сѐ што останува, додека реалноста ни се претвора во урбанистички кошмар!

Исто така, како член на советот можам да ви кажам дека огромен дел од советниците се “професионални“ и на состаноците на општинската Комисија за урбанизам кога се презентираат плановите, во разговор ќе прифатат дека планот е штетен, се согласуваат со мене. Но, што се случува потоа? По партиска координација, на самата седница на совет, тие истите советници гласаат „колку да помине планот“, понижувајќи ги сите аргументи што сум ги изложил! А има и советници кои во мигот на гласање прошепотуваат: „Појма неам шо гласам!“ – и тоа додека креваат рака! Да, овие зборови ги имам чуено, а многу често одѕвонуваат во мојата глава, затоа што верувам дека тие луѓе не се свесни каква тежина има нивната позиција и какви последици произлегуваат од нивните дејствија!

Исклучок за ова, за мое изненадување, беше гласањето на последната седница на советот, каде што, по долго убедување од моја страна, власта изгласа ПРОТИВ легализација на опасен објект. Инвеститорот бараше намена за лесна индустрија, но објектот се наоѓа во Кавадарци, нема правен статус и власта беше подготвена (барем според она што го видов на комисија) да го помине предметот туку-така, иако објектот не е ни приближно до намената за која би бил легализиран! Среќа, барем еднаш, ја препознаа позадината на моето „скокање“ и се одважија да гласаат против!

Кога реагирам дека во сокаци се планираат згради, не реагирам заради политика, реагирам за да не броиме жртви! Свесен сум дека улиците ни се закрчени, дека секојдневно гледаме паркирани автомобили како блокираат пристапи, дека противпожарно возило нема шанси да помине!

Па побогу, јас со патнички автомобил едвај се движам низ улиците, а камо ли противпожарно возило. Има случаи каде што поради блокирани улици не може да пристапи противпожарното возило и за тоа време запалениот објект продолжува да гори! Особено познат беше и објектот на Архитектонскиот факултет во Скопје кој половина час гореше додека противпожарното возило се обидуваше да пристапи. Во исто време пајак-служба отстрануваше возила од улицата „29-ти Ноември“ додека гореше факултетот!

Како советник, низ 90% од урбанистичките планови кои сум ги анализирал, сум гледал едно исто – неплан, хаос, корупција, поткуп, профит ставен над човечкиот живот! Тука ќе го споменам и притисокот за кој сум чул дека се врши врз вработените во општините за да поминат вакви планови, како и за поткупот кој е јавна тајна!

Законот е партали, адаптиран при секоја промена на власта за да ги задоволи потребите на бизнисмените блиски до актуелната власт! Приватни фирми ги иницираат урбанистичките планови, истите се здружуваат и ги финансираат урбанистичките планови, други приватни фирми изработуваат урбанистички планови, без никаква стратегија и усогласување со населеното место како целина!

Па токму просторното планирање на овие простори кое се интензивира по втората светска војна потекнува од потребата општественото планирање да добие и своја просторна димензија! А сега? Сега профитот станува единствена цел на планирањето, а просторот станува деградиран, нехуман и евидентно… смртоносен!