Американскиот технолошки гигант Интел го прекина мега проектот за изградба на фабрика во Германија
Плановите на Интел да ја одложи изградбата на најголемиот капацитет за производство на чипови во ЕУ ќе ја нарушат целта на Унијата да произведе 20% од глобалните полупроводници, велат експертите.
Американскиот технолошки гигант Интел ја стопира изградбата на две фабрики за производство на чипови во Германија, бидејќи се бори да се спротивстави со намалената продажба и зголемените загуби, објави во понеделникот извршниот директор на компанијата Пат Гелсинџер.
Според Гелсингер, проектот во градот Магдебург во Саксонија-Анхалт се очекува да биде одложен за околу две години.
Компанијата планираше да изгради две фабрики за чипови во Магдебург во вредност од над 33 милијарди долари, со што ќе се отворат околу 3.000 работни места како дел од поголемиот инвестициски план за ЕУ. Интел, исто така, потпиша договор со германската влада за околу 11 милијарди долари државни субвенции за проектот, според новинската агенција ДПА.
Плановите, сепак, беа ставени во мирување бидејќи американскиот технолошки гигант се бори да ги намали загубите и започна програма на намалување на трошоците на почетокот од оваа година. Интел, исто така, соопшти дека ја одложува новата фабрика во соседна Полска.
„Мораме да продолжиме да дејствуваме итно за да создадеме поконкурентна структура на трошоци и да ја испорачаме целта за заштеди од 10 милијарди долари што ја објавивме минатиот месец“, рече Гелсинџер во писмото до вработените.
Германската производна локација требаше да стане најголемата фабрика за производство на чипови поддржана според Законот за чипови на Европската унија кој беше донесен минатата година. Одлуката на Интел да го одложи проектот може да им нанесе удар на плановите на ЕУ за производство на една петтина од светските полупроводници до 2030 година.
„Без Интел во Магдебург, на Европа и недостасува главниот проект“, изјави Франк Бозенберг, управен директор на германската индустриска група Силикон Саксонија, за Блумберг во понеделникот. „Ниту уделот на европскиот пазар од 20 отсто или посакуваниот технолошки суверенитет преку производство на полупроводници под 10 нанометри не изгледаат реално остварливи до 2030 година“, додаде тој.
ЕУ имаше за цел да го зголеми својот глобален удел во производството на чипови на 20% до крајот на деценијата, поддржан со над 44,5 милијарди долари субвенции за привлекување на полупроводнички компании и намалување на зависноста од странство. Проектот на Интел во Германија беше клучна компонента на стратегијата.
По објавата, германскиот министер за финансии Кристијан Линднер побара субвенциите наменети за проектот Интел да се пренаменат за да се затвори дупката во федералниот буџет од 13,3 милијарди долари, проектирана за 2025 година.
