Најмалку 22 лица загинале во серија израелски воздушни напади врз Рафа

Палестинските здравствени власти соопштија дека во серија израелски воздушни напади во текот на ноќта загинале најмалку 22 лица во градот Рафа во јужниот дел на Појасот Газа.

Очевидци и медицински лица изјавија дека воздушните напади погодиле три куќи во Рафа.

Областа лоцирана долж границата меѓу Газа и Египет моментално е дом на повеќе од половина од населението во Газа, бидејќи луѓето бараат засолниште од израелската воена кампања насочена кон елиминирање на милитантната група Хамас.

Израелската војска соопшти дека нејзините воени авиони извршиле напади врз милитантите на Хезболах во јужен Либан.

Официјални лица на Хамас треба да учествуваат во Египет на најновите разговори за предложениот прекин на огнот на Израел, кој ќе вклучи запирање на борбите во период од неколку недели и ослободување на заложниците што ги држеше Хамас во Газа.

Американскиот претседател Џо Бајден и израелскиот премиер Бенјамин Нетанјаху во неделата телефонски разговараа за речиси седуммесечната војна меѓу Израел и милитантите на Хамас во Газа, но Белата куќа не даде непосреден сигнал дека е неизбежен прекин на огнот.

Во соопштението на Белата куќа се вели дека двајцата лидери „ги разгледале тековните разговори за да се обезбеди ослободување на заложниците заедно со итен прекин на огнот во Газа“.

Преговорите се водат со месеци за начините за запирање на борбите, но Израел и Хамас остануваат заглавени во разговорите со посредство на САД, Египет и Катар.