Или политичките партии ќе понудат писмени гаранции или, пак, ќе бидат казнети на избори

Граѓанската иницијатива Спас за струмичката котлина објави проглас, со кој бара политичка поддршка од политичките партии во пресрет на парламентарните избори во Република Македонија.

Прогласот ви го пренесуваме во целост:

До сите политички партии, чинители и граѓани,

Изминатата година во повеќе наврати во нашите текстови искажуваме ставови со кои јасно стававме на знаење дека кога ќе дојде ред за политички избор, наш критериум ќе биде третманот на се уште отвореното прашање за рудникот Иловица Штука и забраната за рудници во Југоисточна Македонија.

Така ќе се разликуваат партија од партија и нема да има можност за маневри со префрлање политичката одговорност преку кадровски решенија пред граѓаните. Едноставно, или партијата ќе застане зад решение или ќе се скрие зад некакво оправдување. Но на граѓаните повеќе не ги интересираат оправдувања, седум години се оправдувања во комбинација со судска корупција од ДУИ бизнис лобито кои во меѓувреме влегоа како сопственици на 25% на уделите на концесионерот Еуромакс Ресурси. Од друга страна пак Цоло Вутов се уште поседува 40% од уделите и затоа добро е да се каже во ваква ситуација кој е на страната на граѓаните, а кој е за местенките на финансиерите на ДУИ и на ГЕРБ во Бугарија!

Сега повторно јавно ги повикуваме за истото, да не се правдаат дека не знаеле.

Конкретно, за сите оние партии, што во програмите нема да го вклучат решавањето на проблемот, ќе се потрудиме да добијат казна на изборите но и ќе бидат изложени на силен јавен притисок во кампањите.

Се согласуваме и го споделуваме во целост со соопштението:

– С О О П Ш Т Е Н И Е –

ИЛИ ПИСМЕНИ ГАРАНЦИИ,

ИЛИ КАЗНА ОД ГРАЃАНИТЕ!

(за Рудникот на смртта)

Наскоро, партиите ќе понудат изборни програми, врз основа на кои треба да ги гласаме. Пред да го направат тоа, сакаме да ги предупредиме на некои реалности. По седум години борба против Рудникот на смртта Иловица-Штука, сѐ уште немаме конечно решение. Сѐ уште постојат заткулисни игри и калкулации.

По седум години малтретирање, не остана да се каже друго, освен следново, кратко и јасно:

1. Аргументите кои ги презентиравме во разни пригоди и периоди, недвосмислено ја докажуваат неоправданоста и погибелната опасност од отворање рудник за бакар и злато во Струмичката Котлина и воопшто во Македонија. Нема да ги повторуваме, ги знаете: убедливи се и непобитни.

2. Македонија е премногу мала територија за да издржи смртоносни загадувачи од таков обем. Егзистенцијално е важно стратегиско обесхрабрување на отровното рударство и воопшто на Г-1 загадувачите. Земјоделието докажано нуди неспоредливо поголеми бенефити за државата и граѓаните.

3. Граѓаните и на локални референдуми, и низ протести, и низ јавната сфера убедливо се изјаснија против рудниците на смртта. Медиумите низ годините исто така, освен неколку докажани платеници. Четирите локални самоуправи, без ниту еден глас за, натпартиски гласаа против рудник. Практично, национален консензус.

4. Платеничките измамнички кампањи за наводно зелено, паметно, одржливо и какво ли не илузорно рударство се неуспешни и неприфатени од граѓаните и јавноста, бидејќи се засновани на безочни лаги, манипулации, клевети, уцени и јалови обиди за поткуп, корумпирање и промена на јавното мислење. Т.н. паметно рударство е продавање ветер во магла, пропаганден конструкт од рударски експлоататори и не се однесува на погубното труењето од ископините (тоа е неминовност), туку на придружните процеси.

5. Следствено, од секоја партија која учествува на изборите, бараме конкретни ПИСМЕНИ ГАРАНЦИИ во програмата дека во првите три месеци од владеењето засекогаш ќе го затвори прашањето со Рудникот на смртта и ќе започне процес со кој Струмичката Котлина и Јужната Долина (Југоистокот) ќе станат заштитени подрачја на кои ќе бидат забранети Г-1 загадувачи, во полза на стимулирање конкурентно македонско земјоделство.

6. Од секој претседателски кандидат го бараме истото, во рамките на ингеренциите, со акцент на ЕКОЛОШКАТА БЕЗБЕДНОСТ на државата.

7. Ќе ги следиме сите партиски и претседателски програми, ќе ги сумираме и ќе ги повикаме граѓаните да гласаат ПРОТИВ оние кои нема да објават такви гаранции. (Наш повик за бојкот на партии на претходен изборен циклус покажа забележливи минусни локални бројки).

Значи, нема лутиш. Граѓаните се тие што треба да се лути, за нас активистите да не зборуваме: сешто истрпевме и трпиме. Повеќе не. Доколку нема гаранции, ќе има тешка граѓанска казна за односни партии. Тоа можеме, толку колку што можеме. И не сме малку. Друг избор немаме. Премногу беше и повеќе од премногу беше. Огромното мнозинство членови на СИТЕ партии се против рудникот, но тоа мора да се ефектуира во партиските програми. Само тоа ќе го броиме.

Вербални ветувања не се доволни повеќе. Натамошно манипулирање, одолговлекување околу Рудникот на смртта е целосно неприфатливо и би произвело несогледливи последици.

Или конечно ќе се соочите со реалноста, или истата ќе ве казни.

…………

Со почит,

Граѓанска иницијатива

СПАС ЗА СТРУМИЧКА КОТЛИНА

04/03/2024

…………

СТОП ЗА РУДНИКОТ НА СМРТТА

З А С Е К О Г А Ш !