Трикафта сè уште нема за сите пациенти со цистична фиброза

Пациентите со цистична фиброза повторно ги потсетија надлежните дека потребна е Трикафта за сите! На европскиот ден за поткревање на свеста за цистична фиброза, тие се искачуваа од средно Водно до врвот на Водно, со водич и лекарски тим, а целта на настанот е да се овозможи терапија за сите и да бидат општествено корисни.

Од Асоцијата за цистична фиброза велат дека битката продолжува-заложбите одат во насока на тоа лекот да се дава и кај деца под 12 години, бидејќи според досегашните критериуми кај нас, трикафтата е наменета само за лица над 12 годишна возраст. 

Овој период е критичен за пациентите со цистична фиброза..со загадениот воздух велат потешко се дише.

Болеста прогресира и состојбата кај пациентите со цф се влошува, затоа од Асоцијата за цистична фиброза потенцираат дека важно е што е можно побрзо да се добие соодветната терапија. 

Пред два дена Владата даде согласност за преземање обврски во програмите опфатени со развојниот дел од буџетот, за чие плаќање е потребно користење буџетски средства во 2024 и 2025 година на Министерството за здравство, за набавка на ваквата комбинирана терапија од скоро 900 милиони денари. Министерството за здравство е задолжено да достави до Владата предлог програма за обезбедување терапија за пациенти со цистична фиброза, за следната година. 

Трикафтата за прв пат беше набавена во март само за 12 пациенти.