Левица: Додека народот работи за мизерни 250 евра месечно, градежната мафија се збогати со над 3 милиони евра во пандемијата!
Секторот за економија при политичката Партија Левица, денес реагираше дека 15те најголеми градежни компании оствариле чист профит од над 17 милиони евра за време на пандемијата, додека пак обичниот работник работи за 250 евра месечно. Меѓу првите компании со најголем профит, односно втор по ред е компанијата „Адора“ на Ванчо Чифлиганец со 3 милиони профит, додека пак на првото место со профит од 3,76 милиони евра е скопската компанија „ЗСФ КОМ“.
„Урбаната мафија не ја пропушти приликата да се збогати за време на глобалната пандемија која економски ја срози Македонија. Дур народот лани уплашен иташе кон своите работни места, плашејќи се да не остане и без својот минимален месечен приход (оној од мизерни 250 евра кој не може да покрие ни половина синдикална кошничка), 15те најголеми градежни компании оствариле чист профит од над 17 милиони евра!
Градежната компанија „Адора Инженеринг“, која е во сопственост на озлогласената фамилија Чифлиганец, за која годинава изби скандалот дека КРАДЕЛА квадрати при продажба на своите станови, е на високото второ место, остварувајќи чист профит од 3 милиони евра, додека на првото место со добивка од 3,76 милиони евра се најде скопската ЗСФ КОМ. Овие компании очигледно не живеат во истата бедна реалност во која што живееме ние, па нив не ги погодуваат такви концепти како економски кризи и сиромаштија“, се вели во реакцијата од Левица.
Партијата реагира и за алармантното растење на цените на становите за метар квадратен, бидејќи како што најавија и самите градежници, наскоро цената ќе достигне дури 2000 евра по квадрат во Скопје.
Левица исто така реагира на тоа што веќе одамна становите се градат претежно за екстремно богатите, кои инвестираат во станови кои подоцна ги издаваат под кирија, а на тој начин продолжуваат да се богатат без да работат ништо.
„Во меѓувреме, градежниците алармираат дека цената на квадратот и понатаму ќе расте, и немало да биде чудно да видиме и станови кои чинат 2000 евра по квадрат во Скопје. Така, ако досега човек со просечна плата требаше да работи 15 години и да не потроши ни денар (малтене, да живее на воздух) за да може да купи еднособен стан од 50 квадрати, во иднина истиот ќе треба да работи уште 10 години повеќе за да си дозволи еден ваков „луксуз“.
Веќе одамна становите во Македонија се градат претежно за есктремно богатите, кои или не знаат што да им прават на парите, па ги вложуваат во станови како безбедна и исплатлива инвестиција, или купуваат станови за истите да ги издаваат под кирија и да продолжат да се богатат без ништо да работат!“, посочуваат од секторот за економија на Левица.
Во реакцијата исто така се нагласува дека со ваквиот тренд класните разлики во Македонија само ќе растат, бидејќи како што велат, народот ниту со кредит нема да може да си купи стан, а од држава изградена на социјални темели, полека ќе прерасне во држава на потстанари кои единствено ќе „уживаат во придобивката“ да немаат паркови и зеленило во сопствените општини.
