Димитриев: „Инвестициски бум“ на ВМРО-ДПМНЕ е лажна пропаганда – долгови, пенали и недовршени проекти

Координаторот на Секторот за финансии на Левица, Марјан Димитриев, во објава на Фејсбук остро ги критикува тврдењата на ВМРО-ДПМНЕ за наводен „инвестициски бум“ во вредност од 6 милијарди евра, нарекувајќи ги „лажни ветувања и манипулации“.

„Како да ви веруваме кога бројките и фактите говорат спротивно?“ – прашува Димитриев, наведувајќи низа примери кои, според него, ја разобличуваат економската и инвестициската реторика на актуелната власт.

Тој потсетува дека владејачката партија пред изборите се залагала за укинување на префиксот „Северна“, но откако дошла на власт, истиот масовно го имплементирала во сите закони – „и каде што требало и каде што не требало“.

Во делот на јавните инвестиции, Димитриев ја обвинува Владата за само 8% реализација во првиот квартал од 2025 година, иронично коментирајќи дека тоа се должело на „ладното време“, како што изјавила министерката за финансии.

Тој наведува дека Европската комисија и Фискалниот совет укажале на обврската да се пресметуваат 650 милиони евра доспеани, но ненаплатени побарувања од јавните претпријатија во јавниот долг, додека Владата се фали со негово намалување.

Во објавата се споменуваат и повеќе инфраструктурни проекти чија реализација, според Левица, е скапа, бавна и нетранспарентна:

• Пругата кон Бугарија, почната во 1996 година, чија вредност е зголемена од 340 на 560 милиони евра;
  
• Автопатот Кичево – Охрид, почнат во 2014, кој сè уште не е завршен и чини 589 милиони евра;
  
• Коридорите 8 и 10Д, за кои договорот со „Бектел и Енка“ е државна тајна, а чини 1,3 милијарди евра;
  
• 10-километарскиот автопат до границата со Косово, чија цена пораснала од 112 на 198 милиони евра;
  
• Неисплатените камати за 2025 година во износ од 336 милиони евра;
  
• Пенали во вредност од 45 милиони евра поради раскинати договори за Клиничкиот центар во Скопје и болницата во Штип.
  

Димитриев дополнително обвинува за недостиг на долгорочно стратешко планирање, критериуми за избор на проекти и транспарентност во користењето на кредитите и заемите.

„До утре можам да пишувам“, завршува тој, алудирајќи на тоа дека има уште многу што би можело да се посочи како пример за лошо управување и финансиска неодговорност.