Мојсоска: Собранието не открива кој пратеник земал кирија и патни трошоци , три месеци без одговор

Пратеничката од Левица, Јована Мојсоска, реагира дека повеќе од три месеци Собранието на Република Македонија одбива да ѝ ги достави бараните информации за исплатите на патни трошоци и кирии на пратениците за 2024 година. Во своја јавна објава, таа директно го посочува Генералниот секретар на Собранието, Марина Димовска – која, како што наведува, е партиски кадар на ВМРО-ДПМНЕ – за можно свесно кршење на законот и саботирање на нејзиното право како пратеник.

„Дали генералниот секретар на Собранието и партиски кадар на ДПМНЕ – Марина Димовска, по инструкција на матичната партија, ги саботира своите законски должности и свесно не доставува информации од јавен карактер до пратеник?!“, прашува Мојсоска во нејзината објава, поставувајќи сериозни сомнежи за транспарентноста во функционирањето на законодавниот дом.

Пратеничката дополнително укажува дека зад ова одложување можеби стои обид на власта да ја прикрие злоупотребата на државни средства. Според неа, можно е дел од пратениците истовремено да наплатувале и патни трошоци и кирија за стан од државниот буџет – што би било директно кршење на законските одредби.

Овој случај го отвора прашањето за пристапот до информации од јавен карактер, особено кога тие се бараат од страна на избран народен претставник, и ја става под сомнеж транспарентноста на институциите. Во услови кога довербата во политичките и правните механизми е веќе кревка, ваквиот однос кон отчетноста само ги продлабочува перцепциите за заштитеност и неказнивост во врвот на власта.

Мојсоска најавува дека ќе ги искористи сите правни и институционални механизми за да ги добие информациите, но и дека јавноста има право да знае како се трошат парите на граѓаните и кои пратеници можеби незаконски профитирале од државата.