Ниту еден актуелен: Десет поранешни полициски службеници под истрага за пожарот во дискотеката „Пулс“

Јавното обвинителство отвори истрага против десет поранешни полициски службеници под сомнение дека со своето дејствување придонеле кон настанување на пожарот во Кабарето „Пулс“, што во јавноста предизвика сериозни реакции поради безбедносните пропусти.

Како што информираат од Обвинителството, станува збор за лица кои во периодот од 2012 до 2022 година биле вработени во Секторот за внатрешни работи Штип и Полициската станица за општа надлежност Кочани. Според наредбата за спроведување на истражната постапка, осомничените се товарат дека сториле кривично дело Тешки дела против општата сигурност, постапувајќи спротивно на прописите за заштита и безбедност.

Имено, се сомничат дека како службени лица не извршиле целосна и детална проверка при издавање на позитивна согласност за лиценцирање на угостителскиот објект „Пулс“. Со таквото однесување му овозможиле на правното лице да добие лиценца за работа, иако објектот не ги исполнувал предвидените услови за безбедност, посебно во доменот на јавниот ред и мир и сообраќајната безбедност.

Седум од десетте осомничени ќе се соочат со мерки на претпазливост, кои ги предложи јавниот обвинител до судијата за претходна постапка при Основниот кривичен суд Скопје. Преостанатите тројца веќе се достапни на органите на прогонот и се обезбедени преку претходната постапка.

Од Специјализираното одделение при Јавното обвинителство најавуваат дека истражните дејствија продолжуваат, со цел да се идентификуваат и евентуално нови лица инволвирани во случајот.