Кога те варат со Филипче – а ти викаш дека имаш разбирање: Македонскиот политички циркус со Максо како главен паљачо

Го гледав Максим Димитриевски со утринско кафе. Не, не ми дојде дома – беше на телевизија, во “Тема на денот”. И таму, пред очите на јавноста, човекот се сервираше во политичкото мени како ладно предјадење што никој не го нарачал. Каква пониженост, каква трагикомедија: излезе од СДСМ со драмски ефект, фрли некоја фраза за морал, визија и борба против криминалот – само за да заврши во прегратка на ДПМНЕ, партија што го вареше полека, но темелно. Со Филипче, замислете, напиша професорката Билјана Ванковска на Фејсбук.

Максо, сиротиот, не само што не доби главна улога, туку некој заборави и да му даде сценарио. Си седи така во ќошот на сцената, се смее кога Мицкоски ќе трепне, и скромно вели дека „имал разбирање за дијалогот“ – за дијалог што се случува без него, и тоа со неговиот поранешен шеф од СДСМ. Политичка иронија на највисоко ниво.

Но, не грижете се – ДПМНЕ не е суров. Напротив, си направи пакт за ненапаѓање со сите од опозицијата. Со сите… освен со Левица. Таму демек нема дијалог, само оган и жуч, бидејќи – за разлика од останатите – тие не сакаат да седат на маса со месо што веќе е сварено.

ЗНАМ на Максо, инаку крстена како „глас на народот“, сега делува како ехо на коалициски договори направени во тивка соба со звучна изолација. Политичка „Икеа“ – изгледа ново, ама шрафовите се исти. А народот? Тој сè уште бара инспекциска служба за оштетениот политички идентитет.

И додека јавноста гледа како партиите си подаваат рака под маса, Максо си стои со насмевка и повторува: „важно е да има дијалог“. Да, Максо, само што дијалогот си го водат без тебе – а ти си како непоканет кум на свадба на која не знаеш ни кој се жени.

Во земја каде политичките договори се прават со повеќе коалициски апетити отколку изборна програма, останува само едно прашање: дали ЗНАМ ќе премине во НЕЗНАМ, или ќе продолжи да биде гласен само кога ќе му дозволат?

Нејзиниот статус ви го пренесуваме во целост: