(Видео) Крмов иницира надзорна расправа во Собранието за трагедијата во Кочани

Пратеникот од Левица во Изборната единица 3, Борислав Крмов, денес одржа прес-конференција на која објави дека покренува иницијатива за надзорна расправа во Собранието во врска со трагедијата во Кочани.

„Во овие моменти, кога сè уште не е поминат шокот од оваа незамислива национална катастрофа, ние како пратеници мора да поднесеме и морална одговорност,“ изјави Крмов, нагласувајќи дека институциите мора да одговорат каде потфрлиле и зошто се случила оваа трагедија.

Според него, расправата би можела да се одржи во постојаната Анкетна комисија за слободите и правата на граѓанинот, со која раководи Димитар Апасиев, но Левица е подготвена таа да се води и во друга комисија што ќе биде прифатлива за власта и остатокот од опозицијата.

Крмов истакна дека за иницијативата се потребни минимум 15 потписи, од кои Левица веќе има шест, но отвора простор за поширока поддршка, вклучително и за формирање на времена Анкетна комисија, за што ќе бидат потребни 20 потписи.

Тој ја критикуваше реториката на владејачките и опозициските партии, обвинувајќи ги ДПМНЕ и СДСМ дека се препукуваат во медиумите околу тоа дали треба да има надзорна или анкетна расправа, додека вистинските прашања остануваат неодговорени.

„Нема време за одложување. Доволно време одмаравме, сега мора да се делува. Треба да се утврди каде потфрлија органите на државната управа и кои индивидуи се одговорни за оваа трагедија,“ порача Крмов.

Левица очекува поддршка за иницијативата и бара итно започнување на процесот за да се дојде до конкретни одговори кои ги бара јавноста.