Директорот на „Булмак“ не се напи од водата но е под истрага: ОЈО Куманово оформи предмет за Крива река

Основното јавно обвинителство (ОЈО) Куманово денеска официјално потврди дека е оформен предмет за случајот со загадувањето на реката Крива, по наводите дека до загадувањето дошло по хаваријата која се случила во рудникот Тораница. Иако, како што информираат од обвинителството, кривична пријава од општината Крива Паланка сè уште не е пристигната, постапката е започната по сопствена иницијатива.

„Досега кривична пријава од општината Крива Паланка не е пристигната, но обвинителството веќе започна со постапка. Оформен е предмет и издадени се наредби за вештачења. Инспекторите за животна средина се повикани и презеле мерки за контрола. Тие доставија извештај до обвинителството“, информираа од ОЈО Куманово за МИА.

Се продолжува со преземање на други дејства, а вештачењата и наредбите се издадени како дел од истрагата за да се утврдат точното ниво на загадување и можните последици по животната средина.

Денеска, градоначалникот на Крива Паланка, Сашко Митовски, презентираше нови анализи кои, според него, потврдуваат дека водата во реката е сериозно загадена, што дополнително го загрижува локалното население. Во меѓувреме, компанијата „Булмак 2016“, која управува со рудникот Тораница, излезе со соопштение каде категорички негираа дека техничкиот проблем во рудникот довел до загадување на реката.

Овој инцидент предизвика сериозни реакции во јавноста и меѓу еколошките организации, кои се загрижени за здравјето на жителите и влијанието врз животната средина. Понатамошната истрага од ОЈО Куманово ќе треба да даде одговор на сите овие прашања и да утврди евентуални одговорности за загадувањето на Крива река.