Полицаецот од обезбедувањето на Мицкоски заврши во притворот во Шутка поради оддавање службена тајна

Полицаецот Ангел Сарамаков од Велес, кој бил дел од обезбедувањето на премиерот Христијан Мицкоски, доби 30-дневен притвор под сомнение за кривично дело „оддавање службена тајна“, дознава „Скопје1“. Тој е спроведен во затворот во Шутка, каде ќе ја издржува мерката притвор.

Сарамаков беше уапсен во координирана акција спроведена од Обвинителството за гонење организиран криминал и корупција и Министерството за внатрешни работи (МВР). При апсењето, тој бил затекнат во возило „БМВ“ заедно со уште едно лице, кое засега не е опфатено со кривичен прогон.

Според изворите, при претресот во возилото, во ранец на Сарамаков биле пронајдени службени материјали од МВР. Дополнително, од двете лица биле одземени мобилните телефони, а полицијата продолжува со истрагата за евентуално понатамошно инкриминирачко дејствување.

Официјални изјави од надлежните институции засега нема, но се очекува Обвинителството и МВР во наредните денови да излезат со повеќе детали за случајот.