Мојсоска: Дали концесионерите на плажите на Охридското езеро работат легално?

Владата на Република Македонија неодамна најави темелна ревизија на сите издадени согласности за градби, особено во заштитените зони, но јавноста веќе со месеци алармира за сериозните проблеми со дивоградбите и урбанистичката експанзија на брегот на Охридското езеро.

Пратеничката Јована Мојсоска, реагирајќи на состојбата, поднесе писмено прашање до министерот за транспорт, Александар Николовски, барајќи јасни одговори и мерки кои ќе ја заштитат оваа природна и културна богатство.

„Состојбата на нашиот најскапоцен бисер, Охридското езеро, е алармантна. Секојдневно се узурпира државен имот, се гради неплански и без почитување на стандардите на заштитена зона“, напиша пратеничката, нагласувајќи дека Охридското езеро мора да биде заштитено од урбанистичката мафија и прекршувањата на прописите.

Таа праша: „Жителите од Струга и Охрид мора да знаат под кои услови се дадени плажите под концесија и дали концесионерите ги исполнуваат своите обврски?“ и нагласи дека не може и не смее најстарото езеро во Европа да биде искористено за личен профит.

Дополнително, пратеничката ја посочи загриженоста за градењето на хотел на опожарената зона на брегот на Охридското езеро од поранешниот директор на УБК, Сашо Мијалков, што ги отвора сериозните сомнежи за урбанистичката мафија која ја загрозува вредноста на ова природно богатство.

„Непроценливите вредности на Охридското езеро се под напад на урбанистичката мафија, а штетите од толерирањето на овој криминал ќе ги плаќаат идните генерации“, додава пратеничката Мојсоска.

Таа апелира за итни и темелни мерки кои ќе ја заштитат иднината на Охридското езеро, истакнувајќи дека без преземање конкретни чекори за ревизија и проверка на дозволите, ризикот за неговото понатамошно уништување е реален.