Исмаил до Николоски: Kако можете да ги проверите лиценците во два дена, а претходно не можевте за цела година?

• Став објавен на социјалните мрежи од Пратеникот на Левица – Реџеп Исмаил, којшто го прашува министерот за Транспорт Николоски, како успеале за два дена да ги проверат сите лиценци, а претходно за една година власт не успеале да проверат ниту една?

„Министерот за транспорт и врски, Николовски, за само два дена изјави дека „направиле ревизија“ на сите издадени лиценци од страна на неговото министерство, а веќе следниот ден призна дека постои огромна дупка во капацитетите на инспекторатите на државните органи.

Како, господине министре, за толку кратко време ги утврдивте сите околности за издадените лиценци, ако истовремено признавте дека инспекторатите немаат капацитет?

Оваа контрадикторност упатува на заклучок дека проверките што ги споменувате биле направени исклучиво врз основа на документацијата, без увид во фактичката состојба на терен – односно направена е само „хартиена ревизија“.

Од искуството со ноќниот клуб „Пулс“ во Кочани знаеме дека покрај различните верижни системски пропусти – законски, процедурални и инспекциски – постои и очигледна дискрепанца помеѓу урбанистичките планови и реалната употреба на објектите.

Во случајот со „Пулс“, објектот во Деталниот урбанистички план (ДУП) е класифициран како простор за лесна индустрија, но во реалноста функционирал како ноќен клуб, што претставува сосема различна категорија на намена. ДУП-овите ги изработуваат општините, а мислење за нив дава и Министерството за транспорт и врски.

Овој објект не е дивоградба (за жал) само затоа што е легализиран со фамозниот ВМРО-вски Закон за легализација на дивоградби. Оксиморон, нели? Со тоа, објектот не само што никогаш немал соодветна намена за угостителска дејност, туку и добивал лиценци за таква работа. Истовремено, една од причините за катастрофалните последици е токму фактот што не се водел како дивоградба и не бил предмет на соодветни инспекциски контроли.

Затоа, почитуван министре, имајќи ја предвид извршната власт во вашите раце, поставете ги следниве суштински прашања при креирање на идните политики поучени од горкото искуство на ноќниот клуб „Пулс“:

– Што ќе се прави со легализираните дивоградби (особено оние што се јавни објекти)?

– Зошто постои поделена и нејасна надлежност меѓу локалните инспекторати и централните органи?

– Од каде произлегува информативната какафонија меѓу државните институции?

– Зошто сè уште не се рушат дивоградбите во Маврово, Шапка, Охрид, Струга, Матка…и каде уште не? И тие ли ќе ги легализираме?

– Зошто не се стопирани јавните комерцијални услуги кои работат на диво, каков што на пример е случајот со кајчињата на Матка и Охрид?

– Дали пазарите ширум државата исполнуваат минимални безбедносни стандарди?

– Дали ДУП-овите се изработени согласно урбанистичките стандарди што обезбедуваат основни параметри за безбедност?

Навистине, веќе време е овие прашања да добијат јасни и конкретни одговори, наместо декларативни изјави и административни изговори.

И да, престанете да се пресметувате со политичките противници искористувајќи ја трагедијата – опозиција сме и имаме право да прашуваме а вие имате обврска да одговарате!“