Работници на ОН загинаа во израелски напад
Во последните воздушни напади во Газа загинале најмалку 34 лица.
Агенцијата на ОН за палестински бегалци соопшти дека шестмина нејзини вработени биле убиени во средата во израелски воздушен напад врз училиште кое се користело како засолниште за раселените луѓе во центарот на Газа.
Воздушните напади спроведени во текот на ноќта од страна на израелските одбранбени сили (ИДФ) во енклавата, исто така, погодија две куќи и убиле најмалку 34 лица, меѓу кои 19 жени и деца, објави Асошиејтед Прес, цитирајќи официјални претставници на болницата.
„Шест колеги загинаа денеска кога два воздушни напади погодија училиште и неговата околина во Нусејрат во средните области“, објави Агенцијата на Обединетите нации за помош и работа за палестинските бегалци на Блискиот Исток (UNRWA) во објава на X (поранешен Твитер). додавајќи дека нападот резултирал со најголем број жртви меѓу персоналот во еден инцидент.
Истото училиште беше погодено пет пати од почетокот на израелската воена операција во Газа како одговор на прекуграничниот упад на Хамас на 7 октомври, според агенцијата. Се вели дека зградата засолнила околу 12.000 раселени цивили, од кои повеќето биле жени и деца.
Генералниот секретар на ОН, Антонио Гутереш, ги осуди „неприфатливите“ напади во објавата на X (Твитер), повикувајќи на крај на кршењето на меѓународното хуманитарно право.
Како одговор, амбасадорот на Израел во ОН го обвини генералниот секретар за искривување на реалноста, тврдејќи дека е „несовесно што ОН продолжуваат да го осудуваат Израел во неговата праведна војна против терористите, додека Хамас продолжува да ги користи жените и децата како жив штит“.
Израел во последните месеци нападна неколку училишни згради, тврдејќи дека палестинските милитанти се кријат на локациите меѓу раселените цивили. Хамас постојано ги негираше обвинувањата.
Израелската војска претходно соопшти дека извршила „прецизен удар“ врз терористичките оперативци на Хамас и палестинскиот Исламски џихад во командниот центар лоциран во рамките на хуманитарната зона одредена од Израел во централна Газа. Во соопштението не се наведува точниот исход, но се вели дека се преземени „бројни чекори“ за да се намали ризикот за цивилите.
Во текот на изминатите 11 месеци, воените дејствија предизвикани од упадот предводен од Хамас ги однесоа животите на речиси 41.100 Палестинци, а повеќе од 95.000 други беа ранети во воздушни напади и копнена офанзива, според Министерството за здравство на Газа.
