(Видео) Протест против ДУП кој предвидува висококатници во Лисиче – Левица дава поддршка

Граѓани од населбата Лисиче до пароли: „Уништивте уште една населба”, „Дојдов, украдов, заминав- Тимчо”, „Колку од становите се за Тимчо?”, протестираа пред седиштето на Општина Аеродром, откако на седница на Совет шверцерски беше изгласан ДУП со кој се предвидува и висококатница во населбата Лисиче. Левица им даде поддршка на граѓаните, а советниците од Левица гласаа против спорниот ДУП.

Советникот Горан Костовски од Левица истакна дека се прекршени повеќе процедури, така што ДУП-от за Лисиче ќе биде оспорен. Освен што точката е ставен вон Деловникот на општината тоест ДУП-от бил донесен и како „дополнителна точка“ на самата седница, а немало итност.

,,Не помина на Комисија за урбанизам каде јас сум член. И затоа ќе следува претставка. Исто така, по Деловникот на Општина Аеродром, кога се носи ваква ,итна’ точка, било кој советник може да побара пауза од неколку часа, доколку сака да спреми амандмани. Меѓутоа, мене тоа деловничко право не ми беше овозможено од претседателот на Советот, Дејан Митески за што ќе следува и преставка до инспекторатот за локална самоуправа. Дополнително, планот добил и позитивно мислење од Министерството за транспорт и врски без потпис на досегашниот министер Благој Бочварски, или негов заменик. Меѓутоа, одобрувањето е ден пред седницата, а министерот е во оставка и не може да одобрува ДУП. Така што, ова ќе се спори и на Уставен суд”, посочи Костовски.

Според него, ако се изгради зграда од 12 ката, тогаш Лисиче ќе биде под канџите на градежната мафија. Која ќе почне насилно да им ги откупува бараките на локалните староседелци. Наместо Лисиче да остане населба со индивидуално домување таа ќе прерасне во урбанистичка грдосија налик на стар Аеродром.

Советниците од Левица најавуваат дека следи кривична пријава за несовесно работење во службата до претседателот на Совет, Дејан Митевски, поради одземање на советничкото право за поднесување амандмани и насилничко прекршување на Деловникот, поради што и видеото од седницата општинската администрација го скри како приватно за јавноста да не може да го гледа.

ДУП-от беше усвоен со 16 гласа ЗА од страна на советниците на ДПМНЕ.